Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 519 Hüküm no: 644 Orijinal metin no: [123b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurşunlu Han’daki kiracıların odalarının kirasına yapılan zama itirazlarının yersiz olduğu Ma‘rûz. Tüccâr tâifesinden ashâb-ı arzuhâl Uğurlu ve Mardiros ve Kirkor ve Agop ve Filyos ve diğer Mardiros nâm zimmîler meclis-i şer‘de derûn-ı arzuhâlde mezkûr Simkekşhâne kurbünde vâki‘ Kurşunluhan demekle ma‘rûf hânda fevkānî ve tahtânî yirmi dört bâb odaya mutasarrıf olan sâbıkā Darbhâne-i âmire kâtibi merhûm Ömer Efendi’nin kebîre kızı ve sâir evlâd-ı sıgārının bâ-hüccet vasiyy-i mansûbesi olan Emetullah nâm hatunun vekîl-i şer‘îsi el-Hâc Hasan nâm kimesne mahzarında biz kadîmden berü hân-ı mezbûr müstecirlerinden olup zikrolunan odalarda kadîmden berü beher şehr ellişer para icâre ile sâkinler iken vekîl-i mezbûr hilâf-ı kadîm bir seneden berü beherodabaşına onar para dahi zam ve gadretmişdir ve zikrolunan odaların el-yevm ellişer paradan ziyâde icâreye tahammülü yokdur deyü her biri ba‘de’d-da‘vâ ve’l-münâza‘a istikşâf-ı hâl için kıbel-i şer‘den bi’t-taleb kâtib dâ‘îleri irsâli ile mârru’z-zikr odaların ecr-i misli imâm ve müezzin ve sâir civârda sâkin cemm-i gafîr bî-garaz Müslimînden tefahhus ve suâl olundukda zikrolunan odaların beher şehr altmışar paraya icâra ecr-i misilleridir bundan noksan ile îcâr olunmak eytâm-ı mezbûrûna gadrdır deyü ihbâr etmeleriyle müdde‘ûn-ı mezbûrûn ber-vech-i muharrer altmışar paradan noksan icâra teklîfinden men‘ olundukları huzûr-ı âlîlerine i‘lâm olundu. Fermân hazret-i veliyyü’l-emrindir. Fî 23 Cumâdelâhire sene [1]143.