Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 519 Hüküm no: 643 Orijinal metin no: [123b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havass-ı Mahmudpaşa cizyedarı ile reayanın anlaştıkları ve reayanın hasımları Hüseyin’i bulup teslime kefil oldukları Ma‘rûz. Halil Çavuş kulları mübâşeretiyle Bâb Mahkemesi’ne ihzâr olunan Havâss-ı Mahmudpaşa re‘âyâsı cizyedârı Abdurrahman Ağa tarafından sâbitü’l-vekâle vekîli olan diğer Abdurrahman b. Osman meclis-i şer‘de mezkûrûn re‘âyâdan ma‘lûmü’l-esâmî zimmîler muvâcehelerinde zikrolunan re‘âyânın müvekkil-i mezbûr Abdurrahman Ağa’ya ber-mûceb-i temessük deynleri olmağın hasımları Hüseyin gaybet etmekle deyn-i mezkûrlarını edâ ettiklerinde mezbûr Hüseyin’i bulup kendilere teslîme ta‘ahhüd ve ber-vech-i muharrer tekeffül eylediğini bi’l-vekâle ikrâr ve takrîr eyledikde mezkûrûn re‘âyâ dahi râzı ve kat‘-ı nizâ‘ ettikleri mübâşir-i mezbûr iltimâsıyla huzûr-ı âlîlerine i‘lâm olundu. Fî 22 Cumâdelâhire sene [1]143.