Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 520 Hüküm no: 646 Orijinal metin no: [124a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un oğlu Mustafa’nın ölümüyle ilgili iddiasının doğru olmadığı Ma‘rûz. Sâhibe-i arzuhâl Fâtıma Hatun Halil Çavuş mübâşeretiyle Mahkeme-i Bâb’a ihzâr ettirdiği Bostanî el-Hâc Halil ve zevcesi Hadice Hatun mahzarlarında ben târih-i i‘lâmdan üç sene mukaddem mezbûr merhûm Sultan Ahmed Hân hazretleri evkāfından mutasarrıf oldukları menzillerine karib yine vakf-ı mezbûrdan bir bâb menzile bi’l-icâreteyn mutasarrıfe iken mezbûrânın yedlerinde olan müte‘addid i‘lâmlar mantûku üzere beynimizde menzile müte‘allika nizâ‘-i küllî vukū‘unda mezbûrân benim ile gāib ani’l-meclis zevcim Ali ve oğlum Mustafa’dan teşekkî ve li-ecli’l-murâfa‘a ahz ettirdiğinden üç gün sonra oğlum mezbûr Mustafa bizi ahz ettirdir deyü havfından nâşî kendiyi sâkin olduğumuz menzilin bacasından atıp ba‘dehû vefât etmekle oğlum mezbûrun ber-vech-i muharrer vefâtına sebeb olmuşlardır deyü tasaddî eylediği da‘vâsı meşrû‘a olmayıp ve mezbûrâna şer‘an suâl dahi teveccüh etmediğinden gayrı istikşâf-ı hâl için husûs-ı mezbûr kâtib dâ‘îleri irsâli ile mahalle-i mezbûre imâmı Süleyman Efendi ve Müezzin Mehmed Halîfe ve ahâlî-i mahalle-i mezbûreden müseccelü’l-esâmî beş nefer Müslimînden tefahhus ve suâl olundukda mezbûre Fâtıma’nın mezbûrândan müdde‘âsı mukaddemâ beynlerinde vâki‘ adâvetine binâen olup ve oğlu mezbûr dahi kendi eceli ile bi-emri’llâhi te‘âlâ vefât etmişidi deyü ihbâr etmeleriyle mezbûre Fâtıma mezbûrân el-Hâc Halil ve Hadice Hatun’a bî-vech mu‘ârazadan men‘ olunduğu mübâşir-i merkūm iltimâsıyla huzûr-ı âlîlerine i‘lâm olundu. Fî 23 Cemâziyelâhir sene [1]143.