Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 521 Hüküm no: 648 Orijinal metin no: [124a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balçık ve Kavarna kazaları cizyesi için peşin aldığı parayı ödemesi için Hüseyin Ağa’ya tenbih olunduğu Ma‘rûz. Sâhib-i arzuhâl Ahmed Haseki Pravadi cizyedârı Hüseyin Ağa ile ba‘de’l-murâfa‘a mezbûr Hüseyin Ağa bin yüz kırk üç senesi evrâkından bana Balçık ve Kavarna kazâsı için iki bin üç yüz kâğıd verip lâkin ber-mûceb-i tahvîl kendiye teslîm eylediğim dokuz bin beş yüz guruşdan mâ‘adâ peşin kendiye teslîm eylediğim bin beş yüz guruşu hesâbına mahsûb etmek murâd eylediğimde bi’l-külliye inkâr eyledi deyü meblağ-ı mezbûru da‘vâ ve mezbûr Hüseyin Ağa cevâbında ber-mûceb-i tahvîl dokuz bin beş yüz guruşu ikrâr lâkin meblağ-ı mezbûr bin beş yüz guruşu inkâr eylediğinde müdde‘î-i mezbûr müdde‘âsını udûl-i Müslimînden el-Hâc Mehmed b. Hüsrev ve Mustafa b. Mehmed şehâdetleriyle vech-i şer‘î üzere isbât etmekle meblağ-ı mezbûr bin beş yüz guruşu müdde‘î-i mezbûr Ahmed Haseki’ye ya edâ veyâhud hesâbına mahsûb etmek üzere mezbûr Hüseyin Ağa’ya tenbîh olunduğu huzûr-ı âlîlerine i‘lâm olundu. Fermân men-lehü’l-emrindir. Fî 24 Cemâziyelâhir sene [1]143.