Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 523 Hüküm no: 653 Orijinal metin no: [124b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atanaş’ın elh-i harbe buğday sattığı iddasının doğru olmadığı ve hapisten tahliyesi talebi Ma‘rûz. Fermân-ı âlîlerine imtisâlen ehl-i harbe hınta bey‘i töhmetiyle mahbûs olan sâhib-i arzuhâl Atanaş zimmînin ahvâli vukūfu olanlardan istihbâr olundukda Limni cezîresi sükkânından kuzâtdan Ebûbekir Efendi ve Mustafa Çorbacı ve Mustafa Ağa ve diğer Mustafa ve İbrahim Beşe ve es-Seyyid Ahmed ve kefere tâifesinden Manol ve İstimat ve Laskari ve Kostantin ve Salamon nâm kimesneler mesfûr Atanaş ehl-i harbe hınta bey‘ eylediği [vâki‘] olmayıp fakīrü’l-hâl olmağla bir keyl buğdaya dahi mâlik değildir lâkin sâbıkā cezîre-i mezbûre cizyedârı Hasan Ağa ve Voyvoda el-Hâc Abdullah ve metrepolid olan Pratenso nâm kimesneler cezîremizde re‘âyânın zulmen akçelerini almalarıyla mezbûrlar ile Âsitâne-i sa‘âdet’de murâfa‘a olunmak için ahâlî-i cezîre-i mezkûre mahbûs-ı mesfûr Atanaş’ı [125a] işbu hüccet-i şer‘iyye mantûkunca taraflarından vekîl etmeleriyle mezbûrlardan birisi murâfa‘a havfından töhmet-i mezkûre ile ithâm ve iftirâ-yı mahz eylemişlerdir deyü mesfûr Atanaş’ın afv u ıtlâkını iltimâs eyledikleri huzûr-ı âlîlerine i‘lâm olundu. Fermân men-lehü’l-emrindir. Fî 26 Cemâziyelâhir sene [1]143.