Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 524 Hüküm no: 654 Orijinal metin no: [125a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşandığı karısının mehrini ödemesi için Mehmed b. Kemaleddin’e tenbih olunduğu Ma‘rûz. Sâhibe-i arzuhâl Zeyneb bt. Seyfullah b. Mustafa tarafından vekîl olduğu Süleyman b. Ali ve Hüseyin b. Abdullah şehâdetleriyle sâbit olan el-Hâc Osman meclis-i şer‘de Mehmed b. Kemaleddin muvâcehesinde mezbûr Mehmed müvekkilem mezbûre Zeyneb Hatun’ın zevci olmağla bundan akdem bâyinen tatlîk etmekle zimmetinde mütekarrir ve ma‘kūdun-aleyh olan bin guruş mehr-i müecceli mezbûr Mehmed Çelebi’den bi’l-vekâle taleb ederim deyü da‘vâ eyledikde ol dahi mehr-i mezkûrdan ancak yüz guruşunu ikrâr mâ‘adâyı inkâr edicek müdde‘î-i mezbûr müdde‘âsını ber-vech-i muharrer mezbûr Mehmed Çelebi muvâcehesinde ancak altmış bin akçeyi şuhûd-ı udûlle isbât etmeğin mûcebiyle meblağ-ı mezbûr altmış bin akçeyi müvekkile-i mezbûreye edâ ve teslîme mezbûr Mehmed’e tenbîh olunduğu huzûr-ı âlîlerine i‘lâm olundu. Fî 26 Cumâdelâhire sene [1]143.