Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 526 Hüküm no: 661 Orijinal metin no: [125b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bali’nin ölmeden önce cariyesi Hadice bt. Abdullah’ı azat edip onunla evlendiği Ma‘rûz. Havâs-ı Aliyye kazâsına tâbi‘ Otakçılar nâm mahalde sâkin iken bundan akdem fevt olan Ali Bâli b. Mustafa’nın anası Havvâ Hatun, Hadice bt. Abdullah nâm hatun ile ba‘de’l-murâfa‘a mezbûre Hadice mûrisim müteveffâ-i mezbûrun câriyesi olmağla istirkāk murâd eylediğimde rıkkıyetini inkâr eder deyü da‘vâ ve mezbûre Hadice mukaddemâ müteveffâ-i mezbûrun câriyesi olduğunu ikrâr lâkin hâl-i hayâtında beni i‘tâk ve ba‘dehû tarafımdan vekâleten sekiz bin akçe mehr-i müeccel ile beni kendiye akd ve hattâ batnımda müteveffâ-i mezbûrdan hamlim dahi olduğundan mâ‘adâ vech-i meşrûh üzere olduğunu hâl-i hayâtında ikrâr dahi etmişidi dedikde udûl-i Müslimînden Mustafa b. Hüseyin ve İbrahim b. Davud ve es-Seyyid Ali b. Ahmed ve Feyzullah b. Ali ve Salih b. Nasuh nâm kimesneler müteveffâ-i mezbûr hâl-i hayâtında Hadice nâm câriyemi i‘tâk ve sekiz bin akçe mehr-i müeccel ile tarafından vekâleten kendime akd eyledim deyü huzûrumuzda ikrâr etmişidi deyü her biri vech-i şer‘î üzere şehâdet ve ba‘de’t-ta‘dîl ve’t-tezkiye mezbûre Hadice’nin yedinde olan fetvâ-yı şerîfe mefhûm-ı münîfi üzere mezbûre Hadice’nin ıtk-ı verâsetine ba‘de’l-hükm müdde‘iyye-i mezbûre Havvâ bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 20 Cumâdelâhire sene [1]143.