Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 529 Hüküm no: 666 Orijinal metin no: [126a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cizye cibayetine memur Hüseyin Ağa üzerine açılan davanın meşru olmadığı Ma‘rûz. Vilâyet-i Rumeli’nde vâki‘ Dimetoka kasabasına tâbi‘ Çalı nâm karye re‘âyâlarından ashâb-ı arzuhâl Kosko ve Margirit ve Mosko ve Kalo nâm zimmîler bundan akdem medîne-i mezbûre re‘âyâsının cizye cibâyetine bâ-fermân-ı âlî memûr olan Hüseyin Ağa muvâcehesinde merkūm Hüseyin Ağa karye-i mezkûrede mütemekkin kefere re‘âyâlarına tevzî‘ eylediği cizye evrâklarının mâl-ı mîrîsi ba‘de’t-tahsîl re‘âyâ-yı merkūmeden edâ tezkiresi vermek için mecmû‘ re‘âyâdan dört yüz seksen guruşumuzu ahz u kabz etmişdir deyü da‘vâ edip lâkin mezbûrûnun takrîr-i meşrûhaları üzere re‘âyâ-yı merkūmenin mecmû‘u hâzır veya taraflarından vekîl-i şer‘îleri olmadıkça da‘vâlarını istimâ‘ meşrû‘ olmamağla ahâlî-i karye-i mezbûrenin huzûrlarına tevkīf olunduğu huzûr-ı âlîlerine i‘lâm olundu. Bâkī fermân men-lehü’l-emrindir. Fî 5 Recebi’l-ferd sene [1]143.