Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 530 Hüküm no: 672 Orijinal metin no: [126b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Süleyman’a ehl-i zimmetin işlerine karışmaması tenbihi Ma‘rûz. Bürüncek bükücü hırfetinden cem‘-i kesîr ma‘lûmü’l-esâmî ehl-i zimmet re‘âyâ meclis-i şer‘de biz şâkirdlerimizden san‘atını kemâ-hüve hakkuhû tahsîl edenleri kethüdâmız işbu hâzır bi’l-meclis Mustafa Çelebi ve yiğitbaşımız diğer Mustafa Çelebi ve sâir ba‘zı ihtiyârlarımız ile yedimizde olan hüccet ve emr-i âlîşân mûcebince başka teferrüc etmek murâd eylediğimizde hırfet-i mezkûre erbâbından işbu el-Hâc Süleyman ve karındaşı Mahmud nâm kimesneler bizde ve muhtârımız olan kethüdâ-yı mezbûrda kat‘â bir akçe ve bir habbe hakkı yoğiken mücerred tam‘-ı hâmlarından nâşî hüccet-i mezbûre ve emr-i âlîye muhâlif umûrumuza müdâhale eylemeleriyle mezbûr el-Hâc Süleyman ba‘de’l-istintak umûrumuza müdâhale etmemek üzere tenbîh olunması murâdım[ız]dır dediklerinde mezbûr el-Hâc Süleyman fi’l-hakīka kethüdâ-yı mezbûr ve re‘âyâ-yı mezkûre yedlerinde ve zimmetlerinde bir akçe ve bir habbe hakkı olmadığını ikrâr u i‘tirâf etmeğin ber-mûceb-i hüccet ve emr-i âlî mezbûr kethüdâ ve mezbûrûn re‘âyâ umûruna müdâhale etmemek üzere mezbûr el-Hâc Süleyman’a tenbîh olunduğu huzûr-ı âlîlerine i‘lâm olundu. Bâkī fermân men-lehü’l-emrindir. Fî 8 min-Recebi’l-ferd sene [1]143.