Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 531 Hüküm no: 673 Orijinal metin no: [126b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sirozlu el-Hâc Hasan Ağa’nın Hüseyin Ağa üzerine açtığı emanet para davasından men olunduğu El-emru kemâ-zükire fîhi nemekahü’l-fakīru ileyh subhânehu ve te‘âlâ Abdurrahman el-kādı bi-medîneti Kostantıniyye el-mahmiyye. Gufira-anhu Fi’l-asl medîne-i Siroz ahâlîsinden olup mahmiye-i İstanbul’da müsâfiren sâkin el-Hâc Hasan Ağa b. Ömer b. Abdullah tarafından da‘vâ-yı âti’z-zikre vekîl olduğu Mustafa Çavuş b. Mehmed ve Mustafa Bey b. Yunus şehâdetleriyle şer‘an sâbit olan Hasan Ağa b. el-Hâc Mustafa nâm kimesne meclis-i şer‘-i şerîf-i enverde sadrâzam-ı sâbık merhûm İbrahim Paşa hazînedârı Mustafa Ağa etbâ‘ından râfi‘u’l-kitâb Hüseyin Ağa b. Ahmed mahzarında bi’l-vekâle üzerine da‘vâ ve takrîr-i kelâm edip müvekkilim merkūm Sirozî el-Hâc Hasan Ağa Açık? mukāta‘asi’çün merkūm İbrahim Paşa hazînedârı Mustafa Ağa’ya ver deyü mezbûr Hüseyin Ağa yedine beş yüz guruş ve kapı harcı nâmıyla dahi iki yüz elli guruş ki min-haysu’l-mecmû‘ yedi yüz elli guruş teslîm ol dahi kabz ve tesellüm edip mezbûr Hazînedâr Mustafa Ağa’ya vermeyip yedinde kalmağla suâl olunup meblağ-ı mezbûru bana red ve teslîme merkūm Hüseyin Ağa’ya tenbîh olunmak bi’l-vekâle murâdımdır dedikde gıbbe’s-suâl mezbûr Hüseyin Ağa cevâbında fi’l-hakīka müvekkil-i merkūm Sirozî el-Hâc Hasan Ağa hazînedâr-ı mezbûr Mustafa Ağa’ya ver deyü mukāta‘a-i mezbûr için beş yüz guruş ve kapı harcı nâmıyla iki yüz elli guruş ki cem‘an yedi yüz elli guruşu kendiye teslîm eylediğini ikrâr lâkin meblağ-ı mezbûru tamamen ve kâmilen merkūm Hazînedâr Mustafa Ağa’ya teslîm eyledim yedimde ve zimmetimde bir akçe ve bir habbe bâkī kalmadı deyü def‘le mukābele ve husûs-ı mezkûrda merkūm Hüseyin Ağa yemîniyle tasdîk olunur ümenâdan olmağla vekîl-i mezbûr talebiyle meblağ-ı mezbûr yedi yüz elli guruşu Hazînedâr Mustafa Ağa’ya tamamen teslîm edip yedinde ve zimmetinde bir akçe ve bir habbe bâkī kalmadığına yemîn teklîf olundukda ol dahi alâ-vefkı’l-mesûl yemîn bi’llâhi’l-aliyyi’l-a‘lâ etmeğin vekîl-i mezbûr mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe sene selâse ve erba‘în ve mi’ete ve elf. Şuhûdü’l-hâl: El-hâc Ali el-bevvâb, es-Seyyid Mustafa b. ( ), Hezargradlı Mehmed Ağa, Osman Çavuş b. Şa‘ban Çavuş, Mehmed Ağa b. Receb, Mustafa b. Receb, el-Hâc Hasan Çelebi, Mustafa Çavuş, Berber Ya‘kub Çelebi, Abdullah Çavuş.