Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 532 Hüküm no: 675 Orijinal metin no: [127a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tatarpazarı’ndan Râbia Hatun’un veraset davasının Edirne’de görülmesi talebi Ma‘rûz. Vilâyet-i Rumeli’nde Tatarpazarı kazâsı sâkinelerinden sâhibe-i arzuhâl Râbia Hatun bt. el-Hâc Mehmed’in vekîl-i şer‘îsi Abdurrahman Ağa müvekkilenin li-eb er karındaşı İbrahim Çelebi ile ba‘de’l-murâfa‘a mezbûr el-Hâc Mehmed bundan akdem fevt olduğunda verâseti zevcesi Zeyneb Hatun ile kebîr oğlu Mehmed ve sagīr oğlu mezbûr İbrahim ve kebîre kızları Râbia ve Sâre ve Sâliha ve sagīre kızı Afîfe’ye ba‘de’l-inhisâr mezbûre Afîfe ve ba‘dehû mezbûr Mehmed dahi fevt olmalarıyla müteveffâ-i evvel el-Hâc Mehmed’in kazâ-i merkūmede vâki‘ akārâtını mezbûr İbrahim ba‘de’l-bülûğ fuzûlî zabt etmekle emlâk-ı mezkûre bi-hükmi’l-münâsahati’ş-şer‘iyye müvekkilem hissesine isâbet edeni taleb ederim deyü da‘vâ ve mezbûr İbrahim senedâtım kazâ-i merkūmdadır deyü ta‘allül edip ve mezbûr İbrahim sipâhî olmağla vekîl-i mezbûr Abdurrahman da‘vâ-yı mezkûresi Edirne kethüdâyeri mübâşeretiyle Edirne kādısı huzûrunda görülmek üzere fermân-ı âlî iltimâs eylediği huzûr-ı âlîlerine i‘lâm olundu. Emr hazret-i veliyyü’l-emrindir. Hurrire fî-16 Receb sene [1]143.