Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 271 Hüküm no: 382 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Mavrodi’nin Yako v. İsrail’e ait içki fıçılarını gemisi ile götürürken birisini harcaması sebebiyle açılan davaya sulh bedeli karşılığı son verildiği Mahmiye-i İstanbul’da Verke cemâ‘atinden Yako v. İsrail nâm Yahûdi mahfil-i kazâda sefîne reislerinden işbu bâ‘isü’l-kitâb Panayot v. Mavrodi nâm zimmî muvâcehesinde ikrâr-ı tâm ve takrîr-i kelâm edip târîh-i kitâbdan on ay mukaddem sefînesine bin üçer yüz akçe navl ile Ayazmend iskelesinde üç bin dokuz yüz akçeye üç fıçı hamr tahmîl olmuş idim. Mezbûr Panayot ol fıçılardan yüz elli medre bir fıçı hamrımı istihlâk etmekle hâlen taleb eylediğimde benimle beş bin üç yüz akçeye sulh olup ben dahi sulh-i mezbûru kabûl eylediğimden sonra bedel-i sulh olan meblağ-ı mezbûr beş bin üç yüz akçenin bin dokuz yüz akçesi navlundan hesab olunup bâkī kalan bin dört yüz akçeyi dahi bi’t-tamam ahz u kabz eyleyip husûs-ı mezbûra müte‘allik da‘vâdan mezbûr Panayot’un zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim, mezbûr ile min-ba‘d da‘vâm kalmadı dedikde gıbbe’t-tasdîkı’l-mu‘teber mâ-vaka‘a bi’t-taleb ketb ü sebt olundu. Fi’l-yevmi’l-muntasıf min-şehri Recebi’l-ferd li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî Beşe b. Hüseyin, Mehmed Çelebi b. Hüseyin, Ali Beşe b. Abdullah çukadâr ve gayruhum.