Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 271 Hüküm no: 381 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in vefât eden es-Seyyid Mustafa’dan emaneten aldığı parayı vârisine iadesi Vilâyet-i Anadolu’da Giresun kazâsına tâbi‘ Dereli nâm karye sâkinlerinden işbu bâ‘isü’l-kitâb es-Seyyid Hasan Çelebi b. es-Seyyid Mustafa nâm kimesne meclis-i şer‘-i hatîr-i lâzımü’t-tevkīrde ve mahmiye-i İstanbul’da Çukurhamamı kurbünde sâkin Mustafa b. Mehmed mahzarında üzerine da‘vâ ve takrîr-i kelâm edip li-eb ammim es-Seyyid Osman’ın sulbî oğlu olup mahmiye-i İstanbul’da Süleymâniye tımarhânesinde fevt olan mûrisim es-Seyyid Mustafa hâl-i hayâtında ve kemâl-i sıhhatinde mezbûr Mustafa’ya yüz kıt‘a riyâlî guruş emâneten def‘ ve teslîm edip ol dahi meblağ-ı mezbûru tesellüm eylemiş idi. Hâlâ fevt olup meblağ-ı mezbûr irsen bana intikāl etmeğin taleb ederim suâl olunsun dedikde gıbbe’s-suâl mezbûr Mustafa cevâbında meblağ-ı merkūmu emâneten müteveffâ-i mezbûrdan kabz ve tesellüm eylediğini ikrâr ve müdde‘î-i mezbûr müteveffâ-i merkūmun vârisi olduğunu inkâr edicek müdde‘î-i mezbûr es-Seyyid Hasan Çelebi’den müdde‘âsına muvâfık beyyine taleb olundukda kazâ-i mezbûre ahâlîsinden olan udûl-i Müslimînden es-Seyyid Mahmud Çelebi b. es-Seyyid Ali nâm kimesneler li-ecli’ş-şehâde meclis-i şer‘a hâzirûn olup istişhâd olunduklarında fi’l-hakīka müdde‘î-i mezbûr es-Seyyid Mustafa’nın babası es-Seyyid Osman li-eb karındaşı Şükrü’dür, babaları ismi es-Seyyid Yusuf’dur ve dedeleri es-Seyyid Mustafa’nın hasran vârisidir, zâhirde müdde‘î-i mezbûrdan gayrı vâris-i ma‘rûfu olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü herbiri edâ-yı şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri mükbûle olmağın mûcebince meblağ-ı mezbûr yüz guruşu müdde‘î-i mezbûr es-Seyyid Hasan’a def‘ ve teslîme mezbûr Mustafa’ya tenbîh-birle mâ-vaka‘a bi’t-taleb ketb olundu. Tahrîren fi’l-yevmi’l-hâmis aşer min-Recebi’l-ferd li-sene erba‘a ve sittin ve elf. Şuhûdü’l-hâl: Ali Beşe b. Abdullah çukadâr, İbrahim Çelebi b. Davud er-ressâm, Pîrî Beşe b. Hüseyin, Rıdvan b. Abdullah, Muharrem b. Abdullah, Derviş b. Ali, Ramazan b. Yusuf, Halil b. Lütfi ve gayruhum.