Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 273 Hüküm no: 385 Orijinal metin no: [56b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlya v. Mosi’nin el-Hâc Ömer’den aldığı borca kefil olan Kemal b. Bayram’ın borcun bir kısmını ödediğinden geri kalanın affedildiği Mahmiye-i İstanbul’da Havuzlu Mescid Mahallesi’nde sâkin el-Hâc Ömer b. el-Hâc Halil mahfil-i kazâda mahmiye-i merkūmede Kedüz cemâ‘atinden Kemal v. Bayram nâm Yahûdi tarafından ikrâr-ı âti’l-beyânı tasdîka vekîl olup vekâleti hasm-ı câhid-i şer‘î mahzarında İslâm Çavuş b. Mustafa ve Abraham v. Aydın şehâdetleri ile şer‘an sâbite olan işbu bâ‘isü’l-kitâb İlya v. Mosi muvâcehesinde ikrâr-ı tâm ve takrîr-i kelâm edip sabıkā Edirne’de gümrük emîni olan gāib ani’l-meclis Arslan nâm Ermeni zimmetinde cihet-i karz-ı şer‘îden bin altı yüz kıt‘a riyâlî guruş-ı kebîr hakkım olup meblağ-ı mezbûrun cem‘îsine müvekkil-i mezbûr Kemal emr ve kabûlü hâviye kefâlet-i sahîha-i şer‘iyye ile kefîl bi’l-mâl olmuş idi. Hâlâ mezbûr Kemal’den herbir zirâ‘ı ikişer riyâlî guruşa olmak üzere elvânı beynimizde ilm-i şer‘î ile ma‘lûm üç yüz zirâ‘ Parus çuka ve yüz kıt‘a riyâlî guruş ki cem‘an yedi yüz guruş kefâleti hasebiyle ahz u kabz edip dokuz yüz guruş hakkım bâkī kaldı idi, el-hâletü hâzihî mezbûr Kemal’i kefâletinden ihrâc edip bâkī kalan dokuz yüz guruş hakkımı da‘vâ ve mutâlebeden mezbûr Kemal’i ibrâ ve ıskāt eyledim, bu husûsa müte‘allık mezbûr Kemal ile ve kayınatası işbu hâzır bi’l-meclis Abraham v. Haydar ile da‘vâ ve nizâ‘ım kalmadı dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-sâdis aşer min-şehri Recebi’l-ferd li-sene erba‘a ve sittin ve elf. Şuhûdü’l-hâl: Abdi b. Receb, Yusuf b. Abdullah, Ali b. Mehmed, Yusuf b. Mustafa, İbrahim Bey b. Abdullah ve gayruhum mine’l-huzzâr.