Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 273 Hüküm no: 386 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Efendi’nin, anneleri Hayrünnisa Hatun’dan kalan eve ait hissesini sattığı Medîne-i hazret-i Ebî Eyyüb el-Ensârî -radiye anhu Rabbühü’l-bârî- mahallâtından Hamza Bey es-Silahî Mahallesi’nde sâkine iken fevt olan merhûm Hayrünnisa Hatun bt. el-merhûm Abdulkādir Efendi’nin verâseti sadrî kebîr oğulları mefâhirü’l-kuzât İbrahim Efendi ve İsmail Efendi ve Abdulkādir ebnâ el-merhûm Mehmed Efendi’ye münhasıra olduğu şer‘an mütehakkık oldukdan sonra mezbûr Abdulkādir Efendi mahfil-i kazâda işbu râfi‘ayü’l-kitâb mezbûrân İbrahim Efendi ve İsmail Efendi mahzarlarında bi’t-tab‘i’s-sâf ikrâr u i‘tirâf edip vâlidemiz müteveffâ-i mezbûrenin muhallefâtından mahalle-i mezbûrede vâki‘ etrâf-ı erba‘ası Mehmed Efendi b. Hasan ve Fâtıma bt. Ali mülkleri ve makābir-i Müslimîn ve tarîk-i âm ile mahdûd üç bâb fevkānî odaları ve sofayı ve iki nerdübân ve bir orta kapıyı ve tahtânî iki bâb odaları ve taş nerdübânı ve bir orta kapıyı ve yine bir fevkānî ve bir tahtânî odaları ve iki zokak kapısını ve hadîka-i zât-ı eşcâr-ı müsmireyi ve bi’r-i mâ ve kenîfi müştemil olup bi-hasebi’l-irsi’ş-şer‘î bize intikāl eden menzilden benim mülk-i mevrûsum olan üç sehmden bir sehm hisse-i şer‘iyye-i şâyi‘amı mezkûrân İbrahim Efendi ve İsmail Efendi’ye iki yüz kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip onlar dahi ale’l-iştirâki’s-seviyy iştirâ ve tesellüm ettiklerinden sonra semeni olan meblağ-ı mezbûr iki yüz kıt‘a riyâlî guruşu yedlerinden bi’t-tamam ve’l-kemâl ahz u kabz eyledim min-ba‘d menzil-i mahdûd-ı mezkûrda benim alâka ve medhalim kalmayıp keyfe mâ yeşâ’ ve yehtâr mutasarrıf olsunlar dedikde mukırr-ı mezbûr Abdulkādir Efendi’yi ikrâr-ı meşrûhunda mezbûrân İbrahim Efendi ve İsmail Efendi herbiri vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâbi‘ aşer min-şehri Recebi’l-mürecceb li-sene erba‘a ve sittin ve elf. Şuhûdü’l-hâl: Ahmed Efendi b. Mehmed el-kādı, Yusuf Çelebi b. Ali, Ali Çelebi b. Şeyh Zülfikār, Abdülbâki b. Mehmed İbrahim Çelebi b. Davud ve gayruhum mine’l-huzzâr.