Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 275 Hüküm no: 389 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi’nin vefât eden ortağı Kaliçeci Mehmed’de olan alacağının terekeden verilmesi Mahmiye-i İstanbul’da Samanveren Mahallesi’nde sâkin İsmail Çelebi b. Hasan nâm kimesne meclis-i şer‘-i hatîr-i lâzımü’t-tevkīrde diyâr-ı Mısır’da Bender-i Reşid’de ticâret üzere iken vefât eden Kaliçeci Mehmed’in sulbî oğlu ve hasran vârisi olan Mustafa Çelebi tarafından husûs-ı âti’z-zikre vekîl olup hasm-ı câhid mahzarında Halil Çelebi b. el-Hâc Ahmed ve İbrahim Çelebi b. Ahmed nâm kimesneler şehâdetleri ile şer‘an vekâleti sâbite olan Ali Beşe b. Mustafa nâm kimesne muvâcehesinde üzerine da‘vâ ve takrîr-i kelâm edip müteveffâ-i mezbûr Mehmed ile hâl-i sıhhatinde şirket-i inân ile şerîkler olup yedine üç yüz kıt‘a riyâlî guruş sermâye teslîm ol dahi tesellüm edip ba‘dehû fesh-i şirket eyleyip meblağ-ı mezbûrun yetmiş guruşunu ahz u kabz edip iki yüz otuz guruş hakkım üzerinde bâkī kalmış idi. Hâlâ vefât etmekle meblağ-ı mezbûru tereke-i vâfiyesinden taleb ederim, suâl olunsun dedikde gıbbe’s-suâl vekîl-i mezbûr Ali husûs-ı merkūmu bi’l-külliye inkâr edicek müdde‘î-i merkūmdan da‘vâsına mutâbık beyyine taleb olundukda udûl-i Müslimîn’den Mustafa Efendi b. Mehmed ve Osman Çelebi b. İskender nâm kimesneler li-ecli’ş-şehâde meclis-i şer‘a hâzırân olunduklarında fi’l-hakīka müdde‘î-i merkūm müteveffâ-i mersûm Kaliçeci Mehmed ile minvâl-i muharrer üzere şerîkler olup yedine üç yüz kıt‘a riyâlî guruş sermâye bizim huzûrumuzda def‘ ve teslîm ol dahi kabz ve tesellüm edip ba‘dehû fesh-i şirket eyleyip meblağ-ı mezbûrun yetmiş guruşunu mezbûr İsmail Çelebi ahz u kabz edip müteveffâ-i mezbûrun üzerinde iki yüz otuz guruş hakkı bâkī kaldı, biz bu husûsa şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri dahi makbûl oldukdan sonra müdde‘î-i mezbûra iki yüz otuz guruşdan müteveffâ-i merkūmun hâl-i hayâtında küllen ve ba‘zan ahz u kabz ve taraf-ı şer‘iyyeden bir vechile zimmetini ibrâ etmediğine cânib-i şer‘den yemîn teklîf olundukda ol dahi hasebi’l-mesûl yemîn bi’llâhi te‘âlâ etmeğin merkūm Kaliçeci Mehmed yedinde meblağ-ı mezbûr emânet olup bilâ-beyân mücehhelen fevt olmağla damân lâzım olmağın müteveffâ-i merkūmun tereke-i vâfiyesinden meblağ-ı mezbûr iki yüz otuz guruşu müdde‘î-i merkūma edâ ve teslîm etmek üzere tenbîh olunup mâ-vaka‘a bi’t-taleb ketb olundu. Fi’t-tâsi‘ aşer min-Recebi’l-mürecceb li-sene erba‘a ve sittin ve elf. Şuhûdü’l-hâl: el-Hâc Ali Efendi b. Salih, el-Hâc Salim b. Cum‘a, el-Hâc Yusuf b. el-Cerar, el-Hâc Ali b. Zekeriya ve gayruhum.