Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 277 Hüküm no: 391 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın el-Hâc Mehmed’de alacağı olduğu Mehmed Ağa b. el-Hâc Ramazan tarafından husûs-ı âti’l-beyânı da‘vâ ve taleb ve ahz u kabz ve kendüye îsâle vekîl olup vekâleti hasm-ı câhid-i şer‘î mahzarında el-Hâc Ali b. Said ve Ömer Çelebi b. Abdülazîz şehâdetleriyle şer‘an sâbite olan babası işbu bâ‘isü’l-kitâb mesfûr el-Hâc Ramazan <> meclis-i şer‘-i şerîfde sefîne reislerinden el-Hâc Mehmed b. İdris muvâcehesinde bi’l-külliye üzerine da‘vâ ve takrîr-i kelâm edip müvekkil-i mezbûrun merkūm el-Hâc Mehmed zimmetinde mukaddemâ müşterâ ve makbûz olan sefîne semeninden kırk sekiz bin akçe hakkı olup meblağ-ı mezbûrdan kırk beş bin dört yüz akçesin mezbûrun yedinden ahz u kabz edip meblağ-ı bâkī iki bin altı yüz akçeyi vekâletim hasebiyle taleb ederim suâl olunsun dedikde gıbbe’s-suâl mezbûr el-Hâc Mehmed cevâbında meblağ-ı bâkī iki bin altı yüz akçeyi müvekkil-i mûmâ-ileyh Mehmed Ağa’ya bi’t-tamam ve’l-kemâl edâ ve teslîm eyledim dedikde merkūm Mehmed’den da‘vâsını mübeyyine beyyine taleb olundukda ityân-ı beyyineden ızhâr-ı acz etmeğin müvekkil-i mezbûru hîn-i zaferde meblağ-ı bâkī iki bin altı yüz akçeyi ahz u kabz etmediğine tahlîf etmek üzere meblağ-ı merkūm iki bin altı yüz akçeyi vekîl-i mezbûr el-Hâc Ramazan’a edâ ve teslîm etmek üzere mezbûr el-Hâc Mehmed’e tenbîh olunup mâ-hüve’l-vâki‘ gıbbe’t-taleb ketb olundu. Fi’l-yemi’s-sâdis aşer min-Recebi’l-mürecceb li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Mehmed Çelebi b. Hüseyin, Pîrî Beşe b. Hüseyin, Rıdvan b. Abdullah.