Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 611 Hüküm no: 827 Orijinal metin no: [151a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hüseyin Efendi’nin vakfiyesinde yaptığı değişiklik Mâ-fîh mine’r-rücû‘ ve’t-ta‘yîn vaka‘a ledeyye el-fakīr ileyhi sübhânehû ve te‘âlâ es-Seyyid Mehmed Zeynelâbidin el-Hüseynî el-kādı bi-asâkir-i Rumeli. Gufira-leh ve li-vâlideyhî ve eslâfihî ve ahlâfihî İşbu derûn-ı vakfiyede mastûrü’l-ism olan Âişe Hatun bt. Hüseyin Efendi vakfiye-i mezkûrede beyân olunduğu üzere tebdîl ve tağyîr ve taklîl ve teksîr merreten ba‘de uhrâ yedinde olmak üzere şartına binâen mahmiye-i İstanbul’da meclis-i şer‘-i hatîr-i lâzımü’t-tevkīrde takrîr-i kelâm ve tâ‘bir ani’l-merâm edip işbu vakfiyemde mezkûr Ebu’l-feth Sultan Mehmed Hân Câmi‘-i şerîfinde on akçe vazîfe ile tedrîs şartından ve Hadice Sultan Câmi‘i müezzini iki akçe vazîfe şartından ihtiyârım ile rücû‘ edip tedrîs vazîfesi ile müezzin vazîfesi olan on iki akçeyi mezbûrândan ref‘ eylediğimden sonra zevâid-i vakf-ı mezbûrdan hâsıl olan iki akçeyi dahi sâlifü’z-zikr on iki akçeye zammeylediğimde min-haysu’l-mecmû‘ nemâ-yı vakfdan henüz kimesneye ta‘yîn etmediğim on dört akçenin yevmî beş akçesiyle Zincirlikuyu kurbünde Ali Paşa Câmi‘-i şerîfinde Pazar günü Abdullah Efendi vâ‘iz olup sevâbını rûhuma ihdâ eyleye ve zikrolunan Hadice Sultan Câmi‘-i şerîfinde ulemâdan bir kimesne yevmî on akçe vazîfe ile fünûn-ı şettâdan haftada beş gün ders-i âm olup sevâbını rûhuma ihdâ eyleye ve yine Hadice Sultan Câmi‘-i şerîfinde imâm olana bir akçe ve müezzin olana bir akçe vazîfe verilip her biri sevâbı zevcim müteveffâ Ahmed Efendi rûhuna ihdâ eyleyeler ve nîm akçe vazîfe dahi sâlifü’l-beyân Ali Paşa Câmi‘-i şerîfinin kayyûmuna verilip sevâbı rûhuma ihdâ eyleye vezâyif-i mezkûreden fazla kalan iki buçuk akçesi dahi mütevellî vazîfesi ola ve vakf-ı mezkûrumda mahlûl vâki‘ oldukça asl-ı vakfıma zammoluna deyü şart ve ta‘yîn etmeğin mâ-hüve’l-vâki‘ hıfzan li’l-makāl ketb olundu. Fi’l-yevmi’l-hâmis min-Zilka‘deti’ş-şerîfe li-sene erba‘ ve erba‘în ve mi’e ve elf. Şuhûdü’l-hâl: Abdülbâki Efendi b. Ahmed, Salih Efendi b. Mustafa, Mehmed b. Ali. Beyâz, beyâz, beyâz, beyâz.