Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 98 Hüküm no: 63 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin Arabkir’deki bahçeli evini sattığı Fi’l-asl vilâyet-i Anadolu’da Sivas Eyâleti’nde Arapgir kasabası mahallâtından Sükûsî mahallesi âhâlisinden mahmiye-i İstanbul’da Kabasakal <> mahalle[sin]de sâkin İbrahim Çelebi b. el-Hâc Mehmed nâm kimesne meclis-i şer‘-i hatîr-i lâzımü’t-tevkīrde kendi nefsinden asîl ve li-ebeveyn er karındaşları gāibân ani’l-beled es-Seyyid Osman ve es-Seyyid Ebûbekir Ağa ve <> taraflarından husûs-ı âti’z-zikri tasdîka vekîlleri olduğu ber-nehc-i şer‘î sâbit olan es-Seyyid Ömer Ağa ebnâ-i Mustafa mahzarında ikrâr-ı tâm ve takrîr-i kelâm edip akd-i âtî sudûruna değin yedimde mülküm ve hakkım olup zikrolunan Sükûsî mahallesinde vâki‘ bir tarafdan Nu‘man Ağa bahçesi ve bir tarafdan Mâni‘zâde bahçesi ve bir tarafdan ba‘zen Mehmed Bey ve ba‘zen Hanife nâm hatun bahçesi ve bir tarafdan dahi tarîk-ı âm ile mahdûd fevkānî bir bâb oda ve tahtânî bir bâb oda ve eşcâr-ı müsmire ve gayr-ı müsmireyi müştemil mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile beş yüz guruşa gāibân-ı mezbûrân ile merkūm es-Seyyid Ömer Ağa’ya ale’l-iştirâki’s-seviy bey‘ ve temlîk ol dahi vekâleten [16a] ve asâleten iştirâ ve temellük ve kabûl eylediğinden sonra semeni olan meblağ-ı mezbûr beş yüz guruşu es-Seyyid Osman Ağa yedinden tamamen ahz u kabz eyledim fîmâ-ba‘d menzil-i mahdûd-ı mezkûrda kat‘a benim alâka ve medhalim kalmayıp mezbûrûn karındaşların vech-i muharrer üzere ale’l-iştirâki’s-seviy mülk-i müşterâları olup menzil-i mahdûd-ı mezkûru mahâllinde kabz ve tesellüme mezbûrûn es-Seyyid Ömer Ağa ve es-Seyyid Ebûbekir Ağa’yı taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Şevval li-sene selâse ve erba‘în ve mie ve elf. Şuhûdü’l-hâl: Hüseyin Ağa b. Ahmed, es-Seyyid Halil Ağa b. Mustafa, Yusuf Çelebi b. Mahmud, es-Seyyid İbrahim b. Ahmed.