Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 100 Hüküm no: 65 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı Peço’nun mutfak eşyalarına el koyan Yusuf aleyhine açtığı davanın sulhla sonuçlandığı Mahmiye-i İstanbul’da Tahtalkal‘a kurbünde vâki‘ Kādıhanı demekle ma‘rûf hânda sâkin aşçı ve kebabcı ve hoşâbcı tâifesinden Peço v. Sano nâm zimmî meclis-i şer‘-i şerîf-i enverde hân-ı mezkûr müste’ciri bâ‘isü hâze’l-kitâb el-Hâc Yusuf b. el-Hâc İbrahim mahzarında ikrâr ve takrîr-i kelâm edip târih-i kitâbdan bir sene mukaddem bi-gayr-ı hakkın beni habs ve müste’cir olduğum dükkânımda mevcûd ber-mûceb-i müfredât altmış vakıyye evânî-i nühâsiye ve sâir beynimizde ma‘lûm şerbet ve hoşâbcı âlâtımı gasb etmeğin zikrolunan eşyâ ve âlât-ı mevcûde ise a‘yânın müstehleke ise ba‘de’s-sübût kıymet-i şer‘iyelerini mezbûr el-Hâc Yusuf’dan taleb ve da‘vâya üzerine şürû‘ eylediğimde beynimizde nizâ‘-ı küllî cereyân etmişidi. El-hâletü-hâzihi beynimizde muslihûn tavassut edip mezbûr el-Hâc Yusuf’u da‘vâ-yı mezkûremden benim ile yirmi dokuz vakıyye evânî-i nühâsiye ve otuz guruş üzerine musâlaha ettiklerinde ben dahi sulh-ı mezkûru kabûl ve bedel-i sulh-ı mezkûr yirmi dokuz vakıyye evânî-i nühâsiye ve otuz guruşu mezbûr el-Hâc Yusuf yedinden ahz u kabz eylediğimden sonra husûs-ı mezkûra müte‘allika âmme-i de‘âvî [ve] mutâlebât ve eymân ve muhâsamâtdan ben mezbûr el-Hâc Yusuf ile sulbî kebîr oğlu İbrahim Çelebi’yi ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi bedel-i sulh olmak üzere bana medfû‘u olan evânî-i nühâsiye ve meblağ-ı mezkûra müte‘allika de‘âvî ve mutâlebât ve muhâsamâtdan benim zimmetimi ibrâ-i âmm-ı râfi‘u’l-hısâm ile ibrâ ve ıskāt eyledi <> min-ba‘d husûs-ı mezkûra müte‘allika bir birimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Şevval sene 1143. Şuhûdü’l-hâl: Kethudâ Molla Osman b. Mehmed, Yiğitbaşı İbrahim Çelebi b. Hüseyin, Hasan Beşe b. Hüseyin, İbrahim Çelebi b. Hasan, Çörekci Ömer Beşe, Kasım b. el-Hâc Hüseyin, es-Seyyid el-Hâc Mehmed b. es-Seyyid el-Hâc Ahmed, es-Seyyid Mahmud b. ( ) muhzır, İbrahim Çelebi b. Ahmed ve Hüseyin Beşe b. Ali, Mehmed Çelebi b. Abdullah.