Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 101 Hüküm no: 66 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Çelebi’nin Osman Beşe’den satın aldığı Acem asıllı Gülistan isimli cariyenin frengiden ölmesi üzerine verdiği parayı isteme hakkının olmadığı Medîne-i Hazret-i Ebî Eyüb Ensârî aleyhi rahmeti’l-Bârî mahallâtında Câmi‘-i kebîr mahallesinde sâkin Halil Çelebi b. Mustafa meclis-i şer‘-i şerîf-i enverde Dergâh-ı âlî dâme mahfûfen bi’l-meâli cebecilerinin on yedinci bölüğüne mahsûs oda neferâtından işbu râfi‘u’l-kitâb Osman Beşe b. Ahmed, mahzarında üzerine da‘vâ ve takrîr-i kelâm edip mezbûr Osman Beşe târih-i kitâbdan dört ay mukaddem yedinde memlûkesi olduğu hâlde evsâfı beynimizde ma‘lûm Acemiyetü’l-asl Gülistan nâm bir re’s câriyesini budunda tâ‘ûn yarası olduğundan mâ‘adâ uyûbdan sâlime olmak üzere elli üç guruş semen-i medfû‘ ve makbûza bana bey‘ ve teslîm ben dahi ber-vech-i muharrer iştirâ ve tesellüm eylediğimden sonra câriye-i mezkûrenin sol gözü alîl olup ziyâsı bi’l-külliye zâil ve Efrenc marazına mübtelât olduğu ve zikrolunan marazlar câriye-i mezkûrede kadîm olmağla câriye-i mezkûreyi mezbûr Osman Beşe’ye red sadedinde olduğumda mezbûr Osman Beşe diyâr-ı âharda bulunmağın yed-i emînde câriye-i mezkûre maraz-ı mezkûrdan nâşî bi-emrillâhi te‘âlâ fevt olmağla mezbûr Osman Beşe’ye suâl olunup semen-i mezbûru geri bana red ve teslîme tenbîh olunması matlûbumdur dedikde câriye-i mezkûrede zikrolunan marazlar mevcûd ve kadîm olduğu vech-i şer‘î üzere sâbit ve zâhir olmamağla müdde‘î-yi mezbûrun takrîr-i meşrûhu üzere da‘vâsı meşrû‘â ve makbûle olmayıp mezbûr Osman Beşe’ye suâl dahi teveccüh etmemeğin müdde‘î-yi mezbûr bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâmin aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Tahtacı Mehmed Çelebi b. Abdullah, Kādızâde İbrahim b. Mustafa, Mehmed b. Ahmed.