Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 105 Hüküm no: 71 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Trabzon’da vefat eden Mehmed b. Hasan’ın vârislerinin anne ve babasının olduğu Fi’l-asl mahmiye-i İstanbul’da Kapan-ı dakīk dâhilinde Yavuzerzâde mahallesi ahâlîsinden olup medîne-i İzmir’de mutavattın ve Trabzon kasabasında vefât eden Mehmed b. Hasan b. Musa’nın babası ve Emine bt. Hüseyin nâm hatun vâlidesi olduklarını [iddi‘â] eden mezbûrân Hasan ve Emine meclis-i şer‘-i şerîf-i enverde medîne-i mezbûrede emîn-i beytü’l-mâl olmağla müteveffâ-yı mezbûrun ber-mûceb-i defter-i kassâm terekesine vâzı‘u’l-yed olan Süleyman Ağa b. Hüseyin b. Ali tarafından husûs-ı âti’l-beyânda husûmet ve redd ü cevâba vekîlleri olduğu Mustafa Çelebi b. Hasan ve Süleyman Çelebi b. Abdullah nâm kimesneler şehâdetleriyle sâbit olan Mustafa Çelebi b. Mehmed mahzarında her biri üzerine da‘vâ ve takrîr-i kelâm edip müteveffâ-yı mezbûr Mehmed benim firâşımdan hâsıl ve zevce-i menkûham mezbûre Emine’den mütevellid sulbî oğlumuz olup verâseti bize münhasıra ve terekesi sülüs ve sülüsân ber-vech-i muharrer bize isâbet ve intikāl edip bizden gayri vârisi ve terekesine müstahıkk-ı âhar olmamağın hâlâ vekîl-i mezbûra suâl olunup müvekkil-i emîn-i mûmâ-ileyh oğlumuz müteveffâ-yı mezbûrun terekesinden kasr-ı yed ve bize teslîme vekîl-i mezbûra tenbîh olunması bi’l-verâse matlûbumuzdur dediklerinde gıbbe’s-suâl vekîl-i mezbûr cevâbında fi’l-vâki‘ müvekkil-i mûmâ-ileyh müteveffâ-yı mezbûrun ber-mûceb-i defter-i kassâm terekesine bi’l-emâne vaz‘-ı yedini ikrâr lâkin müdde‘iyân-ı mezbûrân ber-vech-i muharrer babası ve vâlidesi olduklarını inkâr edicek müdde‘iyân-ı mezbûrândan müdde‘âlarını mübeyyine beyyine taleb olundukda udûl-i Müslimînden ve mârrü’z-zikr Yavuzerzâde mahallesi ahâlîsinden Mustafa Çelebi b. Mehmed ve Ali Beşe b. Mehmed ve Abdurrahman Çelebi b. Hüseyin ve Ali Çelebi b. Ahmed nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka mahalle-i mezbûre ahâlîsinden medîne-i İzmir’de mutavattın ba‘dehû Trabzon’da vefât eden Mehmed b. Hasan b. Musa’nın firâşından hâsıl ve zevce-i menkûhası işbu Emine bt. Hüseyin nâm hatundan mütevellid sulbî oğulları olup bir müddet medîne-i İzmir’de mutavattın ba‘dehû Trabzon kasabasında vefât eyledi. Müteveffâ-yı mezbûr Mehmed müdde‘î-yi mezbûr müteveffâ-yı mezbûrun baba ve müdde‘iye-i mezbûre Emine vâlidesidir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mezbûrân Mehmed ve Emine meclis-i mezbûrda vekîl-i mezbûr Mustafa Çelebi mahzarında her biri ikrâr ve takrîr-i kelâm edip ânifen edâsına tenbîh olunup müvekkil-i mezbûr yedinde ber-mûceb-i defter-i kassâm ba‘de ihrâci’l-mesârif bâkī kalan dokuz bin dokuz [yüz] yirmi akçeyi vekîl-i mezbûr yedinden sülüs ve sülüsân her birimiz ahz kabz eylediğimizden sonra oğlumuz müteveffâ-yı mezbûrun ber-mûceb-i defter-i kassâm terekesine müte‘allika âmme-i da‘vâdan müvekkil-i mûmâ-ileyh vekîl-i mezbûru ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn ve’l-işrîn min-Şevvali’l-mükerrem li-sene selâse ve erba‘în ve mie elf. Şuhûdü’l-hâl: Mehmed Çelebi b. Abdullah, Kādızâde İbrahim Çelebi b. Mustafa, Mehmed b. Ahmed.