Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 107 Hüküm no: 73 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayacık ahalisinin, voyvodaları Abdullah Ağa’dan Mustafa Ağa ve ortaklarının zoruyla şikayetçi oldukları Bâ-imzâ-i hazret-i efendi. Saruhan Sancağı’nda Kayacık mukāta‘ası ahâlîsinden Molla İbrahim b. Mehmed ve Mehmed b. Ahmed ve el-Hâc Mehmed b. el-Hâc Halil ve Mustafa b. Mehmed ve el-Hâc Musa b. Mehmed ve el-Hâc İbrahim b. Bali ve Ahmed b. Abdullah ve el-Hâc Hüseyin b. el-Hâc Mustafa ve İsmail b. Ahmed ve Mustafa b. el-Hâc İbrahim ve Mahmud b. İvaz ve Hasan b. Mehmed ve Mehmed b. İbrahim ve İsmail b. Hüseyin ve Ahmed b. Ebûbekir ve İbrahim b. Mehmed ve Molla Hüseyin b. Ahmed ve Hasan b. Halil ve Mehmed b. Hüseyin ve Molla Ali b. Abdullah ve Molla Mehmed b. Ahmed ve el-Hâc Halil b. Hasan ve İbrahim b. Osman ve Mehmed b. Alican ve Hamza b. Mahmud ve Ahmed b. Mehmed ve Mustafa b. Abdullah ve Ali b. Hasan ve İbrahim b. Halil ve Ahmed b. İbrahim ve Hasan b. Ahmed ve Osman b. Yusuf ve Kasaboğlu Hacı Ali ve Halil b. Mehmed ve Ali b. Eyüb ve Ali b. Musa ve Hüseyin b. Musa ve Mahmud b. Ahmed ve Veliyüddin b. Şa‘ban ve Mustafa b. Ahmed ve Halil b. Hamza ve Halil b. Ali ve Seyyid İbrahim b. İsa ve Veli b. Mehmed ve Usta Ali b. Yusuf ve Mustafa b. İbrahim ve İbrahim b. Ahmed ve Abdullah b. İbrahim nâm kimesneler meclis-i şer‘-i şerîf-i enverde ber-vech-i mâlikâne mukāta‘a-i mezbûre mutasarrıfı umdetü’l-emâcid ve’l-a‘yân hâlâ Ser-mehterân-ı hayme-i hâssa el-Hâc Abdullah Ağa b. el-Hâc Ali Ağa tarafından mukāta‘a-i mezbûre mültezimi olan râfi‘u’l-kitâb el-Hâc İbrahim Ağa b. el-Hâc Şa‘ban mahzarında her biri takrîr-i kelâm ve ta‘bîr ani’l-merâm edip mezbûr el-Hâc İbrahim Ağa mukāta‘a-i merkūma ber-vech-i mâlikâne mutasarrıf olan mûmâ-ileyh el-Hâc Abdullah Ağa tarafından târih-i kitâba gelince ber-vech-i iltizâm voyvodamız olmağla kendiden ve gāib ani’l-meclis oğlu el-Hâc Mehmed Ağa’dan cümlemiz vücûhla râzı ve şükrân [19a] üzere olup zulüm ve te‘addîsi yoğiken ashâb-ı ağrâzdan Kara Osmanoğlu Mustafa Ağa ve Abdullah Ağa ve Köşklü Mustafa Efendi nâm kimesneler zalemeden olmalarıyla elbetde mezbûrân el-Hâc İbrahim Ağa ve oğlu Hacı Mehmed Ağa’dan Devlet-i aliyye’ye teşekkî edin ve mukāta‘a-i mezbûru biz alalım deyü cebren bizleri şikâyete irsâl etmişler idi. Lâkin mezbûrlar kemâl-i mertebe zalemeden olup ve merkūmân el-Hâc İbrahim Ağa ve oğlu el-Hâc Mehmed Ağa hilâf-ı şer‘ ve kānûn bir akçe ve bir habbemiz almamağla mezbûrân yine ke’l-evvel üzerimize voyvoda olmaların isteriz ve bu âna dek beynimizde cereyân eden mu‘âmelâtdan mezbûrân el-Hâc İbrahim Ağa ve oğlu el-Hâc Mehmed Ağa’nın zimmetlerin ibrâ-i âmm-ı râfi‘u’l-hısâm ve kātı‘u’n-nizâ‘la ibrâ ve ıskāt eyledik. Ba‘de’l-yevm mezbûrân ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Şevval li-sene selâse ve erba‘în mie ve elf. Şuhûdü’l-hâl: Fahrü’l-kuzât Abdullah Efendi b. Musazâde, Fahrü’l-müderrisîni’l-kirâm Mehmed [b.] Abdullah Efendi, Mehmed Ağa b. ( ) kethudâ-yı muhzırân, Salih Çelebi b. Süleyman, Yakub b. Abdullah, Ahmed b. Hasan, Ahmed b. Şa‘ban, Mustafa b. İbrahim.