Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 109 Hüküm no: 74 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey’in İslimye ve İstanimeka panayırı serdârlığını almak için verdiği paranın vârislerine iade edildiği Mahmiye-i Edirne’de Kazasker hamamı kurbünde sâkin iken bundan akdem vefât eden el-Hâc Mehmed b. Hüseyin b. Şa‘ban’ın verâseti zevce-i metrûkesi Zeyneb bt. Osman b. Abdullah nâm hatun ile sulbî sagīr [oğlu] Mehmed ve sagīre kızı Fâtıma’ya münhasıra olduğu şer‘an zâhir ve mütebeyyin oldukdan sonra sagīrân-ı mezbûrânın vâlideleri kıbel-i şer‘den mansûbe vasîleri mezbûre Zeyneb Hatun meclis-i şer‘-i hatîr-i lâzımü’t-tevkīrde müderrisîni’l-kirâmdan sahibü’l-vesîka Mustafa Efendi b. Mehmed tarafından husûs-ı âti’l-beyâna tasdîka vekîl-i şer‘îsi olan el-Hâc Ahmed Efendi b. Mehmed mahzarında ikrâr-ı tâm ve takrîr-i kelâm edip mûrisimiz müteveffâ-yı mezbûr el-Hâc Mehmed hâl-i hayatında müvekkil-i mûmâ-ileyh Mustafa Efendi vezîr-i sâbık İbrahim Paşa’nın imâmı iken İslimye ve İstanimeka panayırı serdârlığı alıvermek için dört yüz beş guruş vermekle husûs-ı mezbûrun husûlü müyesser <> olmamağla bi-tarîkı’r-rüşve makbûzu olan dört yüz beş guruş meblağ-ı mezbûr ol mikdâr guruş zimmetinde kalmağla bana sagīrân-ı mezbûrâna mevrûs olmağın bi’l-verâse vesâye taleb ve da‘vâ eylediğimde müvekkil-i mezbûr dahi inkâr ve gâh ihtifâ etmeğin beyyine ikāmetinden dahi bana acz gelip beynimizde münâza‘ât-ı kesîre ve muhâsamâ[t-ı] şedîde vukū‘undan sonra beynimize muslihûn tavassut edip sagīrân-ı mezbûrân hakkında sulh dahi enfa‘ ve evlâ olmağla ben dahi asâleten ve vesâyeten seksen guruş üzerine sulh eylediklerinde ben dahi sulh-ı mezbûru kabûl ve bedel-i sulh olan seksen guruşu vekîl-i merkūm yediyle bana def‘ ü teslîm ben dahi ahz u kabz eyledim mâ‘adâ üç yüz yirmi beş guruş da‘vâsından müvekkil-i mezbûr Mustafa Efendi’nin ve vekîl-i merkūm el-Hâc Ahmed Efendi’nin zimmetlerini ibrâ-i âm ve kātı‘u’n-nizâ‘la ibrâ ve ıskāt eyledim fîmâ-ba‘d husûs-ı mezbûra müte‘allika vechen mine’l-vücûh ve sebeben mine’l-esbâb da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-işrîn min-Şevvali’l-mükerrem li-sene selâse ve erba‘în mie ve elf. Şuhûdü’l-hâl: el-Hâc Osman Ağa b. el-Hâc Mehmed, Şemseddin Efendi b. Süleyman, Baltacı İbrahim Ağa b. ( ), es-Seyyid Mustafa Efendi Na‘lburzâde, Ali Beşe b. Halil, Mehmed Çelebi b. Abdullah, Balta[cı] el-Hâc Osman b. Mehmed, Ahmed b. Halil, Mehmed Beşe b. Ali, Mehmed b. Veli, Mustafa b. Abdullah.