Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 282 Hüküm no: 401 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miho v. Paho’nun Osman Bey b. Abdullah ile Hasan Bey b. Hüseyin’in hayvanlarını çalması davasına sulh bedeli karşılığı son verildiği Vilâyet-i Rumeli’nde Görice sancağında Opar kazâsına tâbi‘ Moçiniçe nâm karyeden olup hâlâ hadîka-i hâssa bostancılarından olan Osman Bey b. Abdullah ve Hasan Bey b. Hüseyin nâm kimesneler meclis-i şer‘-i hatîrde ve yine karye-i mezbûre ahâlîsinden olup bozacı tâifesinden işbu hâmilü’l-kitâb Miho v. Paho nâm zimmî muvâcehesinde herbiri ikrâr ve takrîr-i kelâm edip mezbûr Miho ma‘lûmü’l-aded sığır ve koyunlarımızı gasb ve istihlâk etmiş idi. Hâlâ sığır ve koyun da‘vâsından mezbûre ile yirmi iki kıt‘a riyâlî guruş üzerine sulh edip ve bedel-i sulh olan meblağ-ı mezbûr yirmi iki kıt‘a riyâlî guruşu merkūm Miho yedinden tamaman ahz u kabz edip husûs-ı mezbûra müte‘allika da‘vâdan herbirimiz merkūm Miho’nun ve mezbûr Miho dahi bizim zimmetimizi ibrâ-i âmm-ı kātı‘u’n-nizâ‘ ile ibrâ ve ıskāt eyledik, biribirimiz ile min-ba‘d da‘vâ ve nizâ‘ımız kalmadı eğer tarafeynden âhar üzerine bi’z-zât ve bi’l-vâsıta mazmûn-ı kitâba muhâlif da‘vâ ve nizâ‘ zuhûr ederse lede’l-hükkâmi’l-kirâm mesmû‘a ve makbûle olmasın dediklerinde mukırrân-ı mezbûrânı kelimât-ı meşrûhalarında mezbûr Miho vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Recebi’l-ferd li-sene erba‘a ve sittin ve elf. Şuhûdü’l-hâl: Osman Bey b. Yusuf el-mübâşir, Ömer Bey b. Derviş? el-bostânî, Mehmed Beşe b. Aydın, Ahmed Beşe b. Hüseyin, Mehmed Çelebi b. Mustafa, Mustafa Beşe b. Abdullah, Rıdvan Beşe b. Abdullah, el-Hâc Şa‘ban b. Ahmed.