Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 282 Hüküm no: 400 Orijinal metin no: [58b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın Ali b. Abdullah’ı bir sene önce azat ettiğinden tekrar köle olarak tasarruf etmemesi gerektiği İşbu bâ‘isü’l-kitâb orta boylu, açık kaşlı, elâ gözlü, kara yağız, Gürciyyü’l-asl Ali b. Abdullah nâm şâb mahfil-i kazâda mevlâsı Mustafa b. Abdullah mahzarında üzerine da‘vâ edip ben mezbûr Mustafa’nın abd-i memlûkü olmağla târîh-i kitâbdan bir sene mukaddem hasbeten lillâhi beni tahrîr ve i‘tâk edip sâir ahrâr-ı asliyyîn gibi hür olmuş iken mezbûr Mustafa mâlikâne beni zabt edip üzerime vaz‘-ı yed eder suâl olunup yed-i âdiyesi kasr ve âzâd olunmak matlûbumdur dedikde gıbbe’s-suâl ve akībe’l-inkâr mezbûr Ali’den da‘vâsına mutâbık beyyine taleb olundukda udûl-i Müslimîn’den el-Hâc Mehmed b. el-Hâc Hüseyin ve Hasan Beşe b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Mustafa abd-i memlûkü mevsûf-ı mezbûr Ali’yi târîh-i kitâbdan bir sene mukaddem hasbeten lillâh bizim huzûrumuzda tahrîr [ve] i‘tâk edip sâir ahrâr-ı asliyyîn gibi hür olmuşdur ancak üzerinde hakk-ı velâsı vardır, biz bu husûsa şâhidleriz şehâdet ederiz deyü edâ-yı şehâdet eylediklerinde gıbbe’t-ta‘dîl ve’t-tezkiye makbûle olmağın mûcebince müdde‘î-i mezbûr Ali’nin ıtkına hükmolunup kasr-ı yedine mezbûr Mustafa’ya tenbîh-birle mâ-vaka‘a bi’t-taleb ketb [olundu]. Fi’l-yevmi’r-râbi‘ min-Şa‘bani’l-mu‘azzam sene 1064. Şuhûdü’l-hâl: Ali Çelebi b. Ramazan el-mübâşir, el-Hâc Ahmed Çelebi b. Mehmed, Hüseyin Beşe b. Mehmed, Ali Beşe [b.] Yusuf, Siyavuş [b.] Abdullah, İbrahim [b.] Davud, Pîrî [b.] Hüseyin.