Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 139 Hüküm no: 113 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un çocuklarına kalan yarım hisse evin tamirine güçleri olmadığından onların yararına satılması için vasîlerine izin verildiği Mahmiye-i İstanbul’da Karakî Hüseyin Çelebi mahallesinde sâkine iken bundan akdem fevt olan Zeyneb bt. Ahmed b. Abdullah nâm hatunun sadriye sagīre kızları Hadîce ve Hafize’nin tesviye-i umûrlarına kıbel-i şer‘den mansûb vasîleri olan fahrü’l-emâsil bâ‘isü hâze’l-kitâb Yusuf Ağa b. Ahmed meclis-i şer‘-i şerîf-i enverde bi’l-vesâye takrîr-i kelâm ve bast-ı merâm edip mahalle-i mezbûrede vâki‘ bir tarafdan Ağa hamamı ve bir tarafdan Küçük Evkāf Halîfesi Abdullah Efendi menzili bir tarafdan Karakî Hüseyin Çelebi Mescid-i şerîfi ve bir tarafdan tarîk-ı âm ile mahdûd arsasının ( ) vakfına yevmî dört akçe icâre ve üzerinde olan ebniyesi mülk menzilin nısf-ı şâyi‘i müteveffât-ı mezbûrenin hayatında mülkü olmağla ba‘de vefâtihâ vasîleri olduğum sadriye kızları merkūmetâna intikāl edip lâkin menzil-i mezbûr müşrif-i harâb olup ta‘mîr ve meremmete sagīretân-ı mezbûretânın akār ve menkūlleri kat‘a ism-i mâl ıtlâk olunur nesneleri olmamağla menzil-i mezkûrdan hisse-i şâyi‘ayı semen-i misli ile âhara bey‘ ve semen-i mezbûr istirbâh ve istiğlâl olunup hâsıl olan <> nemâsıyla sagīretân-ı mezbûretâna infâk ve iksâ olunmak sagīretân-ı merkūmetân haklarında her vechile evlâ ve enfa‘ olmağın hakīkat-i hâl işbu hâzırân bi’l-meclis Müslimînden istihbâr olunup sagīretân-ı merkūmetânın menzil-i mahdûd-ı mezkûrda olan nısf hisse-i şâyi‘alarını ber-vech-i muharrer âhara bey‘a kıbel-i şer‘den bana izin verilmek bi’l-vesâye matlûbumdur dedikde fi’l-vâki‘ kazıyye vasîyy-i mezbûr Yusuf Ağa’nın bâlâda tafsîl ve beyân ve şerh ve ayân eylediği vech üzere olduğunu zeyl-i kitâbda muharrerü’l-esâmî Müslimînden ve her biri meclis-i şer‘de haber vermeleriyle hâkim-i muvakkı‘-ı hâze’l-kitâb tûbâ-leh hüsnü-meâb hazretleri dahi sagīretân-ı merkūmetânın menzil-i mahdûd-ı mezkûrda olan nısf-ı şâyi‘aların semen-i misli ile âhara bey‘a vasîyy-i mezbûra izin birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Ali Efendi b. Mustafa, Salih Ağa b. Mustafa, el-Hâc Ebûbekir Ağa, Kapıcı Hacı Hasan, Kapıcı Hacı Osman, Müezzin Osman Çelebi b. İbrahim, Ahmed Çelebi b. ( ).