Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 138 Hüküm no: 112 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Abdülbaki vakfına ait evin Fâtıma ve Ahmed Çelebi’ye verildiği
Mahmiye-i İstanbul’da Mimar Sinan mahallesi sükkânından Hüseyin Beşe b. İlyas b. Abdullah tarafından husûs-ı âti’l-beyânı ikrâra vekîl olduğu Ahmed Çelebi b. el-Hâc Mehmed ve Osman Çelebi b. İbrahim şehâdetleriyle sâbit ve sübût-i vekâletine hükm-i şer‘î lâhık olan Derviş Çelebi b. Mehmed nâm kimesene meclis-i şer‘-i şerîf-i enverde müvekkil-i mezbûrun zevcesi Fâtıma ve karındaşı Ahmed Çelebi b. el-Hâc Hasan mahzarlarında bi’l-vekâle ikrâr ve takrîr-i kelâm edip zevcesi ashâb-ı hayrâtdan merhûm Abdülbaki nâm sahibü’l-hayrın sulehâ ve sâlihâtdan süknâya muhtâc bir kimesneye meşrûta vakfı olmağa tevcîh-i hâkimü’ş-şer‘le tasarrufunda ve ebniyesi akd-i âti’z-zikrin sudûruna değin ber-mûceb-i hüccet yedimde mülk ve hakkı olup mahalle-i mezbûrede vâki‘ bir tarafdan mahalle-i mezbûre imâmına meşrûta vakıf menzil ve bir tarafdan yine vakf-ı mezbûrdan İbrahim Çelebi verese[si] tasarruflarında olan menzil ve bir tarafdan tarîk-ı âm ve bir tarafdan tarîk-ı hâs ile mahdûd ma‘lûmü’l-müştemilât menzilin ebniye-i memlûke-i ma‘lûmesini cümle tevâbi‘ ve levâhıkı ile tarafeynden îcâb ve kabûlü hâvî şurût-ı müfsideden ârî bey‘-ı bât ile kırk guruşa ale’l-iştirâki’s-seviy mezbûrân Fâtıma ve Ahmed Çelebi’ye <> bey‘ ve temlîk ve teslîm eylediğinde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezbûr kırk guruş mutâlebesinden mezbûrân Fâtıma ve Ahmed Çelebi’nin <> zimmetlerini ibrâ ve ıskāt eylediler dedikde gıbbe’t-tasdîkı’ş-şer‘î mezbûrân Ahmed Çelebi <> ve Fâtıma sulehâdan [29b] süknâya muhtâc oldukları lede’ş-şer‘i’l-enver müte‘ayyin olmağın arsa-i mezkûre ber-mûceb-i şart-ı vâkıf kıbel-i şer‘den mezbûrâna tevcîh ve tasarruflariʼçün izin birle mâ-vaka‘a bi’t-taleb ketb olundu.
Fi’l-yevmi’s-sâmin min-Zilka‘deti’ş-şerîfe li-sene selâse ve erba‘în ve mie ve elf.
Şuhûdü’l-hâl: Mehmed Ağa b. Mehmed kethudâ-yı muhzırân, Mehmed Ağa b. el-Hâc Hasan, Ömer Çelebi b. Süleyman, Tahtabaşı Mehmed Çelebi b. Abdullah, Mehmed Efendi b. Mustafa imâm-ı mahalle-i mezbûre, Müezzin Mehmed Çelebi b. Mehmed, Dânezâde Mustafa Çelebi b. ( ), Ahmed Çelebi b. İbrahim, Osman Çelebi b. İbrahim, Salih b. Süleyman.
|