Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 140 Hüküm no: 115 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un Tevkiî Cafer mahallesinde bulunan evini Salih Çelebi ve karısı Fâtıma Hatun’a sattığı Husûs-ı âti’l-beyânın mahâllinde ketb ve tahrîri için kıbel-i şer‘den irsâl olunan Hüseyin Efendi b. Mehmed mahmiye-i İstanbul’da Cebecibaşı mahallesi sâkinelerinden olup zâtı Ahmed Efendi b. Mustafa Efendi ve Eyüb Çelebi b. Hüseyin nâm kimesneler ta‘rîfleriyle mu‘arrefe olan Râbia bt. Mehmed Ağa nâm hatunun sâkine olduğu menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde mezbûre Râbia Hatun meclis-i ma‘kūd-ı mezkûrda işbu hâfızü’l-kitâb es-Seyyid Salih Efendi b. Mehmed ile zevce-i menkûhası Fâtıma bt. Mehmed Efendi nâm hatun mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Tevkī‘î Cafer mahallesinde vâki‘ bir tarafdan Muhsinzâde bahçesi ve bir tarafdan Berber Ahmed tasarrufunda olan vakıf menzil ve bir tarafdan tarîk-ı âm ile mahdûd fevkānî bir bâb oda ve bir sofa ve bi’r-i mâ ve havluyu müştemil mülk menzilimi tarafeynden îcâb ve kabûl[ü] hâvî bey‘-ı bâtt-ı sahîh-i şer‘î ile mezbûrân es-Seyyid Salih Çelebi ve zevcesi mezbûre Fâtıma Hatun’a ale’l-iştirâki’s-seviy altı yüz elli guruşa <> bey‘ ve temlîk ve teslîm eylediğimde onlar dahi ber-vech-i muharrer iştirâ ve tesellüm ve kabz ve kabûl eylediklerinde sonra semen-i olan meblağ-ı mezbûr altı yüz elli guruşu bi-kadri’l-hısas mezbûrân yedlerinden tamamen ahz u kabz eyledim fîmâ-ba‘d menzil-i mahdûd-ı mezkûr mezbûrânın ale’l-iştirâki’s-seviy mülk-i müşterâları olup benim kat‘a alâka ve medhalim kalmamışdır. Keyfe mâ yeşâ’eyn ve yahtârân mutasarrıf olsunlar dedikde gıbbe’t-tasdîk āni’ş-şer‘î vâki‘ hâli mevlânâ-yı <> mezbûr mahâllinde ketb <> ve ma‘an ba‘s olunan Mustafa b. Ahmed ve Ahmed b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Zilka‘de sene 1143. Şuhûdü’l-hâl: Fahrü’l-kuzât Süleyman Efendi b. Mehmed, Ahmed Efendi b. Mustafa, es-Seyyid Abdüllatif Çelebi b. es-Seyyid Mehmed, es-Seyyid Hasan es-Seyyid Mehmed, es-Seyyid Mustafa Efendi b. es-Seyyid Abdülaziz, Attar İbrahim Çelebi.