Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 141 Hüküm no: 116 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzuncaâbad ve Hasköy kazalarının Kıbtiyân cizyelerinin tahsili Bâ-imzâ-i hazret-i efendi. Mahrûse-i Edirne’de Üskübcü Hızır mahallesi ahâlîsinden olup mahmiye-i İstanbul’da müsâfiren sâkin Mehmed Ağa b. Habib nâm kimesne meclis-i şer‘-i şerîf-i enverde râfi‘u’l-kitâb Kaşıkçı Mustafa Efendi b. Ahmed mahzarında ikrâr-ı tâm ve takrîr-i kelâm edip mahrûse-i mezbûre kurbünde Uzuncaâbad ve Hasköy kazâlarında vâki‘ Kıbtiyân tâifesinin maktû‘ları ve cibâyeti bundan akdem bâ-fermân-ı âlî mezbûr Kaşıkçı Mustafa Efendi’nin ahd-i iltizâmında iken tarafından mahrûse-i mezbûrede sâkin gāib ani’l-meclis Berber Veli nâm kimesneye der-uhde ve iltizâm ol dahi iltizâm ve kabûl eylediğinden sonra mezbûr Kaşıkçı Mustafa Efendi Vezîriazam-ı sâbık İbrahim Paşa’nın kethudâsı maktûl Mehmed Paşa’ya istinâd ile bedel-i iltizâma sen kefîlsin deyü beni üç ay habs ve girih etmekle dört bin dört yüz yetmiş yedi [30b] guruşumu cebren ve bi-gayr-ı hakkın yedimden ahz u kabz eyledi deyü mezbûr Kaşıkçı Mustafa Efendi’den mahmiye-i İstanbul’da hilâfeten müvellâ olan Mukīmzâde Yahya Efendi huzûrunda da‘vâ eylediğimde ol dahi kazıyye vech-i muharrer üzere olup yedimden bi-gayr-ı hakkın dört bin dört yüz [yetmiş] yedi guruş kabzını i‘tirâf etmekle yedimde olan fetvâ-yı şerîfe mûcebince meblağ-ı mezbûru bana red ve teslîme mezbûr Kaşıkçı Mustafa Efendi’ye kıbel-i şer‘den hükm ve tenbîh ve yedime bir kıt‘a hüccet-i şer‘iye ve i‘lâm verilmişidi. El-hâletü-hâzihi meblağ-ı mezbûrdan iki bin guruşu mezbûr Kaşıkçı Mustafa Efendi bana red ve teslîm ben dahi yedinden kabz ve tesellüm edip mâ‘adâ iki bin dört yüz yetmiş yedi guruşa vesâire müte‘allika âmme-i da‘vâdan mezbûr Kaşıkçı Mustafa Efendi’nin zimmetini ibrâ ve ıskāt eylediğimde ol dahi kabûl edip bana red ve teslîm eylediği iki bin guruşa müte‘allika da‘vâdan benim ve âmme-i da‘vâdan mezbûr Berber Veli’nin zimmetlerimiz ibrâ etmekle suâl olunup tarafına hüccet-i şer‘iye i‘tâ olunmak murâdımdır dedikde gıbbe’s-suâl merkūm Kaşıkçı Mustafa Efendi cevâbında fi’l-vâki‘ hâl mukırr-ı mezbûr Mehmed Ağa’nın takrîr-i meşrûhu üzere olup mezbûr Mehmed Ağa’nın ve Berber Veli’nin âmme-i de‘âvî ve mutâlebât ve eymân ve muhâsamâtdan zimmetlerin ibrâ ve ıskāt eylediğini ikrâr ve i‘tirâf etmekle mâ-vaka‘a bi’t-taleb ketb olundu. Fi’l-yevmi’r-râbi‘ min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Veli Ağa b. Rıdvan, el-Hâc Abdurrahman Ağa b. Mustafa, Ahmed Efendi b. Mustafa, el-Hâc Süleyman b. Yusuf, Süleyman Efendi.