Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 142 Hüküm no: 117 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un Akşemseddin mahallesinda bulunan evini Osman Çelebi’ye sattığı Mahmiye-i İstanbul’da Ak Şemseddin mahallesi sâkinelerinden Rukiye bt. Eyüb Efendi [b.] Abdurrahman nâm hatun tarafından husûs-ı âti’l-beyânı ikrâra vekîl olduğu zâtını ârifân Ömer Çelebi b. Süleyman ve Osman b. İbrahim şehâdetleriyle şer‘an sâbit olan Derviş b. Mehmed meclis-i şer‘-i şerîf-i enverde işbu râfi‘u’l-kitâb Osman Çelebi b. Mehmed mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkil-i mezbûrenin yedinde mülk ve hakkı olup mahalle-i mezbûrede vâki‘ bir tarafdan Sâ‘atî Mehmed Çelebi mülkü ve bir tarafdan benim mülküm ve bir tarafdan tarîk-ı âm ile mahdûd ve iki tarafdan taş duvar ve bir bi’r-i mâ ve kenîfi muhtevî arsa-i hâliyesini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile yüz beş guruşa mezbûr Osman Çelebi’ye bi’l-vekâle bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz beş guruşu mezbûr Osman Çelebi yedinden bi’l-vekâle ahz u kabz eyledim. Min-ba‘d arsa-i mahdûd-ı mezkûrda müvekkile-i mezbûre Rukiye Hatun’un kat‘a alâka ve medhali kalmayıp mezbûr Osman Çelebi’nin mülk-i müşterâsı ve hakk-ı sırfı olmuşdur. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Zilka‘de li-sene 1143. Şuhûdü’l-hâl: Mehmed Efendi b. Mustafa el-imâm, Mehmed Ağa b. Mehmed, Abdullah Çelebi b. Abdullah, Musa Ağa serdengeçdi, Mehmed Çelebi b. Abdullah, İbrahim b. Mustafa.