Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 143 Hüküm no: 119 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğin’in Vank köyünden Arakil v. Markar’ın evine Avanis v. Norsis’in haksız yere el koyduğu Bâ-imzâ-i veliyyü’n-ni‘am efendi. Menzil mu‘ârazasından men‘. Vilâyet-i Anadolu’da Eğin kazâsına tâbi‘ Vank karyesi ahâlîsinden olup mahmiye-i İstanbul’da müsâfiren sâkin râfi‘u’s-sifr Arakil v. Markar nâm zimmî meclis-i şer‘-i şerîf-i enverde karye-i merkūme ahâlîsinden Avanis v. Norsis nâm zimmî muvâcehesinde üzerine da‘vâ ve takrîr-i kelâm edip yedimde mülk ve hakkım olup zikrolunan Vank karyesinde vâki‘ ma‘lûmü’l-hudûd menzilimi merkūm Avanis bi-gayr-ı hakkın zabt ve tasarruf etmekle suâl olunup kasr-ı yedine ve mahâllinde bana teslîme merkūm Avanis’e tenbîh olunmak murâdımdır dedikde gıbbe’s-suâl merkūm Avanis zimmî cevâbında fi’l-vâki‘ menzil-i merkūma vaz‘-ı yedini ikrâr lâkin merkūm Arakil menzil-i mezbûru hazır bi’l-meclis Avanis v. Köledarı nâm zimmîye semen-i ma‘lûm ve makbûza bey‘ ve temlîk ve teslîm ol dahi ba‘de’l-iştirâ ve’t-temellük ve’t-tesellüm bana bey‘ ve temlîk ve teslîm eyledi [deyu] def‘le mukābele edicek gıbbe’l-istintâk ve’l-inkâr merkūm Avanis zimmîden def‘-i meşrûhuna mutâbık beyyine taleb olundukda merkūm Avanis zimmî ikāmet-i beyyineden izhâr-ı acz edip tahlîf dahi taleb olmamağla merkūm Avanis zimmîye menzil-i merkūmdan kasr-ı yed ve mahâllinde müdde‘î-yi mezbûr Arakil’e teslîme tenbîh olunup mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘de li-sene selâse ve erba‘în ve mie ve elf. Şuhûdü’l-hâl: Paşa Mehmed Çelebi kethudâ-yı muhzırân, Salih Çelebi b. Süleyman, Çukadâr el-Hâc Mehmed b. Ahmed, el-Hâc Ali b. Ahmed, Mardiroz v. Simaven, Yamendi v. Resail, Avanis v. Şaypaz.