Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 144 Hüküm no: 120 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçiler Kethudâsı Mustafa’nın Cebehâne-i âmire için teslim ettiği unun parasını İstanbul Gümrük Emini İbrahim Ağa’dan aldığı Mahmiye-i İstanbul’da vâki‘ Ekmekçiler Kethudâsı olan el-Hâc Mustafa b. el-Hâc Süleyman nâm kimesne meclis-i şer‘-i hatîr-i lâzımü’t-tevkīrde sâbıkā İstanbul’da Gümrük-i kebîr emîni olan umdetü’l-emâcid ve’l-ekârim câmi‘ü’l-mehâmid ve’l-mehâsin izzetlü el-Hâc İbrahim Ağa b. Ahmed Ağa tarafından husûs-ı âti’z-zikri tasdîka vekîl-i şer‘îsi olan diğer el-Hâc İbrahim Ağa b. el-Hâc Ahmed nâm kimesne mahzarında ikrâr-ı tâm ve takrîr-i kelâm edip târih-i kitâb senesi Cemâziyelevveli’nin on sekizinci gününden sene-i mezkûre Ramazan-ı şerîfi gurresine gelince yüz iki günde bâ-hatt-ı hümâyûn Cebehâne-i âmire neferâtı ta‘yînâtlarıʼçün kabzına me’mûr olanlara bey‘ ve teslîm eylediğim bin beş yüz otuz keyl-i İstanbûlî dakīkin bin keyli yüz yirmişer akçe ve beş yüz otuz keyli [31b] yüz on beşer akçeden min-haysü’l-mecmû‘ yüz seksen bin dokuz yüz elli akçe kıymetlerini müvekkil-i mûmâ-ileyhin mutasarrıf olduğu gümrük-i mezkûr mukāta‘ası mâlından bâ-fermân-ı âlî havâle buyurulmağın emîn-i müvekkil-i mûmâ-ileyh el-Hâc İbrahim Ağa meblağ-ı mecmû‘ yüz seksen bin dokuz yüz elli akçeyi tamamen bana edâ ve teslîm ben dahi mûmâ-ileyh yedinden ber-vech-i muharrer tamamen ve kâmilen ahz u kabz eyledim. Fîmâ-ba‘d bâlâda zikrolunan bin beş yüz otuz keyl-i İstanbûlî dakīk kıymeti olan yüz seksen bin dokuz yüz elli akçeden emîn-i mûmâ-ileyh yedinden ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, Abdullah b. Mustafa, Mustafa Çelebi b. Abdullah, Du‘âcı İbrahim Halîfe b. Mustafa.