Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 155 Hüküm no: 135 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un Semenzâr Hatun vakfından olan yarım ev hissesini kocasına sattığı <> Mahmiye-i İstanbul’da Cezerî Kasım Paşa mahallesinde sâkine olup zâtı ta‘rîf-i şer‘î ile mu‘arrefe olan Hanife bt. Abdullah nâm hatun meclis-i şer‘-i şerîf-i enverde işbu hâfızü’l-kitâb zevc-i dâhili Mustafa Çelebi b. Mehmed mahzarında ikrâr-ı tâm ve takrîr-i kelâm edip merhûme Semenzâr Hatun evkāfından icâreteyn-i ma‘lûmeteyn ile taht-ı tasarrufumda olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât nısf-ı menzilimi üç yüz elli guruş bedel mukābelesinde bâ-izn-i mütevellî zevcim mezbûr Mustafa Çelebi’ye ferâğ ve tefvîz eylediğimde ol dahi ber-vech-i muharrer tefevvüz ve kabûl edip bedel-i mezbûr üç yüz elli guruşu zevcim mezbûr yedinden tamamen ahz u kabz ve kendi mesârifine sarfla istihlâk eylediğimden sonra bedel-i mezkûrun istifâsına müte‘allika âmme-i da‘vâdan zevcim mezbûr Mustafa benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Ebûbekir Odabaşı b. Ali, Hasan b. Mahmud, Ahmed Çelebi b. Hasan, İbrahim Çelebi b. Mustafa.