Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 154 Hüküm no: 134 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eflani’nin İndivânı köyünden Osman Bey tarafından öldürülen Mahmud’un vârislerinin açtıkları davanın sulhla sonuçlandığı Vilâyet-i Anadolu’da Yenice-i Eflani kazâsına tâbi‘ İndivânı nâm karye ahâlîsinden olup mahrûse-i Galata’da vâki‘ Saray-ı hümâyûn’da Ekmekçi Odabaşısı Mehmed b. Mahmud nâm kimesne kendi nefsinden asâleten ve vâlidesi Emine bt. Muslu ve li-ebeveyn kız karındaşları Neslihan ve Fâtıma ve Safiye ve Âişe benâtü’l-mezbûr Mahmud nâm hatunlar taraflarından vekîl olduğu zât-ı mezbûrâtı ma‘rifet-i şer‘iye ile ârifân İsmail Ağa b. Halil ve E[bû] Bekir b. Durmuş nâm kimesneler şehâdetleriyle vekâleti sâbit olan mezbûr Mehmed meclis-i şer‘-i şerîf-i enverde işbu hâfızü’l-kitâb Osman Bey b. el-Hâc Hüseyin nâm kimesne mahzarında bi’l-asâle ve bi’l-vekâle ikrâr-ı tâm ve takrîr-i kelâm edip mûrisimiz müteveffâ-yı mezbûr Mahmud’u târih-i kitâbdan on beş sene mukaddem bi-gayr-ı hakkın darb ve cerh ve katletmişidi deyü mûceb-i şer‘îsini mezbûr Osman Bey’den bi’l-asâle ve bi’l-vekâle taleb ve da‘vâ sadedinde iken beynimize muslihûn tavassut edip da‘vâ-yı mezkûremizden bizi mezbûr Osman Bey ile an inkâr seksen guruş üzerine inşâ-i akd-i sulh eylediklerinde ben dahi bi’l-asâle sulh-ı mezbûru kabûl [35a] ve bedel-i sulh olan meblağ-ı mezbûr seksen guruşu yedinden tamamen ahz u kabz eylediğimden sonra husûs-ı mezbûra müte‘allika âmme-i de‘âvî ve kâffe-i mutâlebâtdan mezbûr Osman Bey’in zimmetini bi’l-asâle ve bi’l-vekâle ibrâ-i âm ile ibrâ ve ıskāt eylediğimde ol dahi kezâlik bedel-i sulh olan meblağ-ı mezbûr seksen guruşa müte‘allika âmme-i de‘âvî ve kâffe-i mutâlebâtdan benim ve müvekkilât-ı mezbûrâtın zimmetlerini ibrâ-i âm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Zilka‘deti’ş-şerîfe li-sene 1143. Şuhûdü’l-hâl: Kadr[i] Beşe b. Mustafa, Mehmed b. Ahmed, Abdullah b. Hasan, Süleyman Ağa b. Abdi, Veli Beşe b. Osman.