Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 156 Hüküm no: 137 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Masarşe v. Arakil Eğin’in Vank köyünde bulunan ev ve bağını Yemandi v. Mosis’e sattığı Vilâyet-i Anadolu’da Eğin kazâsına tâbi‘ Vank nâm karye ahâlîsinden olup mahmiye-i İstanbul’da Alacahamam kurbünde vâki‘ Ekmekçi fırın müste’ciri Masarşe v. Arakil nâm Ermeni meclis-i şer‘-i şerîf-i enverde bâ‘isü hâze’s-sifr Yemandi v. Mosis nâm Ermeni muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup karye-i mezbûrede vâki‘ iki tarafdan Ekmekçi Safer v. Mirohan ve bir tarafdan Mardiros ve Baruh nâm Ermeniler mülkleri ve bir tarafdan tarîk-ı âm ile mahdûd tahtânî iki oda ve bir mahzen ve havluyu muhtevî mülk menzil ile Maskarak nâm mahâlde vâki‘ etrâf-ı erba‘adan Safer v. Ziman bağları ve bağlara giden su mecrâsı ve nehr-i Murad ile mahdûd bir kıt‘a bağımı cümle tevâbi‘ ve levâhıkı ile üç guruşa mesfûr Yemandi’ye bi-safkatin vâhidetin bey‘ ve temlîk ve mahâllinde ve kabz ve tesellüm ve tassarrufa taslît eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr üç yüz guruşu yedinden tamamen ahz u kabz eyledim. Min-ba‘d zikrolunan menzil ve bağ mesfûr Yemandi’nin mülk-i müşterâsı olup kat‘a benim alâka ve medhalim kalmadı. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilka‘de li-sene 1143. Şuhûdü’l-hâl: el-Hâc İbrahim b. Sefer, Mehmed b. Ebûbekir, Mehmed b. Abdullah, Mehmed b. Abdurrahman, Mirohan v. Kazer, Karebet v. Asnador, Astor v. Sergiz, Bedros v. Aleksan.