Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 157 Hüküm no: 138 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaali oğlu Mehmed Beşe’nin İstarova’nın Veliçan köyünde bununan bahçeli evini Mahmud Beşe’ye sattığı Fi’l-asl vilâyet-i Rumeli’nde İstarova kazâsına tâbi‘ Veliçan nâm karye ahâlîsinden olup mahmiye-i İstanbul’da Sultan Ahmed Han aleyhi rahmeti’l-gufrân Câmi‘-i şerîfi kurbünde müşârün-ileyh hazretleri vakfından Arasta odaları demekle ma‘rûf bir bâb menzilde mutavattın olan Kara Alioğlu demekle arîf Mehmed Beşe b. Ahmed nâm meclis-i şer‘-i hatîr-i lâzımü’t-tevkīrde işbu râfi‘ Mahmud Beşe b. Mustafa nâm kimesne mahzarında ikrâr-ı tâm ve takrîr-i kelâm edip karye-i mezbûrede vâki‘ bir tarafdan dere ve bir tarafdan Kılıçoğlu Ali menzili ve bir tarafdan müşteri-yi merkūm Mahmud Beşe mülkü ve bir tarafdan tarîk-ı âm ile mahdûd tahtânî bir bâb ve bir sofa ve bir samanlık ve muttasıl bir harman ve eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkı ile tarafeynden îcâb ve kabûlü hâvî şurût-ı müfsideden ârî bey‘-ı kat‘î ile otuz guruşa bey‘ ve temlîk ve teslîm etmek üzere mukaddemâ bey‘ ve şirâ beynimizde cârî olup henüz semeni kabz olunmamışidi. El-hâletü-hâzihi semeni olan otuz guruşu târih-i kitâb günü mezbûr Mahmud Beşe yedinden tamamen ahz u kabz eyledim. Menzil-i mahdûd-ı mezkûrda kat‘a benim alâka ve medhalim kalmayıp mahâllinde kabz ve teslîme mezbûr Mahmud Beşe’yi taslît eyledim. Keyfe mâ yeşâ ve yahtâr mutassarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fi’l-yevmi’s-sâmin aşer min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Molla Ahmed b. Hamza, Molla Hasan b. Osman, Mahmud Beşe b. Arslan, İbrahim Beşe b. Abdullah, Hüseyin Beşe b. Mustafa, Ahmed Beşe b. İbrahim, İsmail Beşe b. Ahmed, Halil Beşe b. Ali.