Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 163 Hüküm no: 145 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un Gülcâmii mahallesinde bulunan evini sattığı Husûs-ı âti’l-beyânın mahâllinde ketb ve tahrîri iltimâs olunmağın savb-ı şer‘-i şerîf-i enverden irsâl olunan Mevlânâ Müezzinzâde Mehmed Efendi b. İbrahim Efendi Dârü’l-hilâfeti’l-aliyye ve Kostantıniyyeti’l-mahmiye mahallâtından Gül Câmi‘-i şerîfi mahallesinde sâkine Fâtıma Hatun bt. Mahmud’un zikri âtî menziline varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf ettikde zâtı mahalle-i mezbûre imâmı es-Seyyid İbrahim Efendi b. es-Seyyid Abdülfettah ve Müezzin el-Hâc Hasan Efendi b. Ali ta‘rîfleriyle mu‘arrefe olan mezbûre Fâtıma Hatun meclis-i ma‘kūd-ı mezkûrda mu‘arrifân-ı mezbûrân ta‘rîfleriyle mu‘arrefe bâ‘isü’l-vesîka Asiye Hatun bt. Ahmed mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan el-Hâc Mehmed mülkü ve bir tarafdan müşteri-yi merkūme Asiye Hatun mülkü ve bir tarafdan mahalle-i mezbûre müezzinlerine meşrûta vakıf menzil ve bir tarafdan tarîk-ı hâs ile mahdûd fevkānî iki bâb oda ve havlu ve kenîfi müştemil mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûre Asiye Hatun’a elli üç guruş ile min-ciheti’l-keyfiye ma‘lûm ve min-ciheti’l-kemmiye ve’l-mikdâr mechûl bir kabza fülûs-ı mudî‘aya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve kabz [ve] tesellüm eylediğinden sonra semeni olan meblağ-ı mezbûru müşteri-yi merkūme Asiye Hatun yedinden tamamen ahz u kabz eyledim. Fîmâ-ba‘d menzil-i mahdûd-ı mezkûr mezbûre Asiye Hatun’un mülk-i müşterâsı ve hakk-ı sırfı olmuşdur. Keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan Çukadâr Mustafa b. Abdullah ve Muhzır es-Seyyid Mehmed b. Bayram ile meclis-i şer‘a gelip her biri inhâ ve takrîr etmeğin mâ-vaka‘a bi’t-taleb ketb olundu. Fî 22 min-Zilka‘de sene 1143. Şuhûdü’l-hâl: İmâm es-Seyyid İbrahim Efendi, Müezzin el-Hâc Hasan Efendi b. Ali, el-Hâc Hasan b. Ahmed, es-Seyyid el-Hâc Hüseyin b. Seyyid Ahmed, Osman Beşe b. Mehmed, Mustafa b. Ali takyacı, Mehmed Çelebi b. Ahmed, Halil Beşe b. Hüseyin, Hasan Beşe b. Mehmed. Temme’l-kelâm fî hâzihi’l-makām elhamdülillâhi te‘âlâ. Abdurrahman heme kâm-ı dil hâsıl bâd