Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 164 Hüküm no: 146 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce Hatun ve Mehmed Ağa’nın muhâlaa yoluyla boşandıkları El-emrü hasbemâ hurrire fîhi nemekahü’l-fakīr ileyhi sübhânehû ve te‘âlâ Abdurrahman el-kādî bi-medîneti Kostantıniyyeti’l-mahmiye ufiye anhü. Fi’l-asl Mısr-ı Kāhire ahâlîsinden olup mahmiye-i İstanbul’da Silivrikapısı kurbünde İbrahim Paşa mahallesinde mütemekkine ve zâtı ta‘rîf-i şer‘î ile mu‘arrefe Hadîce Hatun bt. Ömer meclis-i şer‘-i şerîf-i enverde zevc-i muhâlı‘ı râfi‘u’l-vesîka Mehmed Ağa b. İbrahim mahzarında ikrâr-ı tâm ve takrîr-i kelâm edip zevcim mezbûr Mehmed Ağa ile beynimizde hüsn-i imtizâc müyesser olmayıp şikāk vâki‘ olmağla zimmetinde mütekarrir ve ma‘kūdün-aleyh olan sekiz bin para mehr-i müeccelimden fâriğa ve nafaka-i iddet-i ma‘lûmem ve me’ûnet-i süknâm dahi kendi üzerime olmak üzere zevcim mezbûr Mehmed Ağa ile muhâla‘a-i sahîha-i şer‘iye ile hul‘ olduğumda ol dahi hul‘ mezbûru kabûl eylediğinden sonra târih-i kitâb gelince beynimizde cereyân eden ahz u i‘tâ ve mu‘âmelât-ı şettâ ve bi’l-cümle hukūk-ı zevciyete ve gayra ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve eymân ve muhâsamâtdan mezbûr Mehmed Ağa’nın zimmetini ibrâ-i âmm-ı kātı‘u’n-nizâ‘ ve râfi‘u’l-hısâm ile ibrâ ve ıskāt eylediğimde ol dahi âmme-i da‘vâdan benim zimmetimi ibrâ ve ıskāt etmekle min-ba‘d ehadühümânın âhar ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 Zilka‘de sene [1]143. Şuhûdü’l-hâl: Mehmed Çelebi kethudâ-yı muhzırân, Salih Çelebi b. Süleyman muhzır, el-Hâc Yakub b. Mehmed, el-Hâc Yusuf Çelebi b. Abdullah, İbrahim Çavuş b. Rasûl, Abdullah Çelebi b. Mehmed, Sarrâc Ebûbekir b. el-Hâc Abdullah, Şamlı Mehmed Çukadâr b. Ahmed, el-Hâc Mehmed b. Hüseyin, el-Hâc Halil b. İsmail, Mustafa Ağa b. Şahin-i Bosnavî tâbi‘-i Kasım Bey.