Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 164 Hüküm no: 147 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un çocuğu için nafaka talebi Mâ fîhi kemâ zükire fîhi nemekahü’l-fakīr ileyhi azze şânuhu ve te‘âlâ Abdurrahman el-kādî bi-medîneti Kostantıniyyeti’l-mahmiye ufiye anhü. Mahmiye-i İstanbul’da Zincirlikuyu kurbünde Hekîm Çelebi tekyesi civârında sâkine ve zâtı ta‘rîf-i şer‘î ile mu‘arrefe râfi‘atü’l-vesîka Afîfe bt. Mustafa Efendi nâm hatun meclis-i şer‘-i şerîf-i enverde zevc-i mutallakı Hasan Bey b. el-Hâc Mehmed nâm kimesne mahzarında takrîr-i kelâm ve ta‘bîr ani’l-merâm edip zevc-i mutallıkım mezbûr Hasan Bey’in firâşından hâsıl ve benden mütevellid sagīr oğlu[m] Salih’in nafaka ve kisve-bahâya ihtiyâcı olmağla babası mezbûr Hasan Bey üzerine nafaka ve kisve-bahâ farz ve takdîr olunmak murâdımdır deyip ve hâl minvâl-i muharrer üzere olduğunu merkūm Hasan Bey dahi ba‘de’t-tasdîk sagīr-i mezbûrun nafaka ve kisve-bahâsıʼçün hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi tarafeynin rızâlarıyla târih-i kitâbdan külle yevm onar sağ akçe nafaka ve kisve-bahâ farz ve takdîr edip meblağ-ı mezbûru sarfa ve vakt-ı zarûretde istidâne ve lede’z-zafer babası merkūm Hasan Bey’e rücû‘a merkūme Afîfe Hatun’a izin birle mâ-hüve’l-vâki‘ bi’t-taleb ketb olundu. Fî 19 Zilka‘de sene [1]143. Şuhûdü’l-hâl: Mehmed Çelebi kethudâ-yı muhzırân, Salih Çelebi b. Süleyman muhzır, el-Hâc Mehmed b. Ahmed çukadâr, el-Hâc Ali Kethudâ.