Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 174 Hüküm no: 158 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un ev ve boş arsasını istiğlâl yoluyla sattığı Mahmiye-i İstanbul’da Karagümrük kurbünde Ali Paşa-yı atîk mahallesi sâkinelerinden zâtı Veliyüddin Efendi b. Ali ve Hüseyin Çelebi b. Mehmed ta‘rîfleriyle mu‘arrefe olan Âişe bt. Ali Efendi nâm hatun meclis-i şer‘-i hatîrde mahmiye-i mezbûrede Karabaş mahallesinde sâkine merhûm Mehmed Sadi Efendi’nin evlâd-ı sıgārı Rukiye ve Mustafa’nın vâlideleri ve tesviye-i emirlerine kıbel-i şer‘den mansûbe bâ-hüccet vasiyyeleri Hadîce bt. Mehmed Efendi nâm hatunun li-ebeveyn er karındaşı ve tarafından husûs-ı âti’z-zikri tasdîka vekîl olduğu ber-nehc-i şer‘î sâbit olan Ahmed Efendi mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Semercizâde Mesud Efendi arsası ve bir tarafdan Mustafa Halîfe arsası ve bir tarafdan Çorbacı zevcesi Fâtıma Hatun menzili ve bir tarafdan tarîk-ı hâs ile mahdûd fevkāni bir bâb oda ve bir bâb tahtânî oda ve bir mahzen ve bir bi’r-i mâ ve kenîf ve tahmînen beş yüz zirâ‘ [40b] arsa-i hâliyemi muhtevî mülk menzilimi bi-cümleti’t-tevâbi‘ ve’l-levâhık müvekkile-i mezbûre Hadîce Hatun’a bi-tarîkı’l-istiğlâl yüz kırk guruşa bey‘ ve teslîm ol dahi yedinde olan sagīrân-ı mezbûrânın babaları müteveffâ-yı mezbûrdan müntakil mâlları ile ber-vech-i muharrer iştirâ ve tesellüm ve semen-i mezkûr yüz kırk guruşu bana def‘ ve teslîm ben dahi yedinden tamamen ahz u kabz eylediğimden sonra müvekkile-i mezbûre Hadîce Hatun’a menzil-i mahdûd-ı mezkûru gıbbe’t-tahliyeti’ş-şer‘iye ve’t-takābuzü’l-mer‘î târih-i kitâbdan bir sene tamamına değin yirmi bir guruşa bana îcâr ve teslîm ben dahi minvâl-i muharrer üzere istîcâr ve tesellüm ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 Zilka‘de sene [1]143. Şuhûdü’l-hâl: Merhabâzâde Mehmed Emîn Efendi, Molla Veli b. Ali, Hüseyin Çelebi b. el-Hâc Mehmed, Mehmed Ağa b. Abdullah, Seyyid Mehmed Çelebi b. Mustafa, Kādızâde İbrahim Çelebi du‘âcı, Köprücü Abdullah Çelebi.