Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 173 Hüküm no: 157 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarhala kasabından Ali’nin kendisini bıçakla yaraladığı iddiasıyla Seyyid Receb aleyhine açtığı davanın sulhla sonuçlandığı Sulh. Mahmiye-i İstanbul’da Tavukpazarı kurbünde Yenihan’da müsâfiren sâkin Ali b. Abdullah nâm kimesne meclis-i şer‘-i şerîf-i enverde işbu bâ‘isü’l-kitâb es-Seyyid el-Hâc Receb b. Mehmed mahzarında ikrâr-ı tâm ve takrîr-i kelâm edip târih-i kitâbdan üç sene mukaddem Tarhala kasabasında sâkin olduğum hâlde mezbûr es-Seyyid el-Hâc Receb Karaağaçlı nâm mevzi‘de siyah saplı bıçak ile benim sol kolum üzerine amden ve bi-gayr-ı hakkın darb ve cerh ve ondan nâşî sol kolum ve baş parmağımdan gayri dört parmaklarım amel ve hareketden kalmağla mûceb-i şer‘îsini mezbûr es-Seyyid el-Hâc Receb’den taleb ve da‘vâ eylediğimde ol dahi husûs-ı mezkûru bi’l-külliye inkâr etmeğin ben müdde‘âmı isbât sadedinde iken beynimize muslihûn tavassut edip da‘vâ-yı mezkûremden mezbûr es-Seyyid el-Hâc Receb’i benimle an inkâr yüz guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezkûrun yirmi guruşunu mukaddemâ ve seksen guruşu hâlâ mezbûr es-Seyyid el-Hâc Receb yedinden tamamen ahz u kabz eylediğimden sonra husûs-ı mezkûra müte‘allika âmme-i de‘âvî ve mutâlebât ve muhâsamâtdan ben merkūm es-Seyyid el-Hâc Receb’in zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi ber-vech-i muharrer bana medfû‘u olan meblağ-ı mezkûr yüz guruş da‘vâsından kezâlik benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi 22 Zilka‘de sene [1]143 Şuhûdü’l-hâl: Mustafa b. Abdullah, es-Seyyid Mehmed b. Hızır, Mehmed Çelebi b. Abdullah, Du‘âcı İbrahim Çelebi, Hüseyin b. el-Hâc Mehmed, Mehmed b. İbrahim.