Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 180 Hüküm no: 167 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keskin’in Yüzdepare mukataası köylülerinin ellerinde olan berat ve defter suretine göre vergilerini vereceklerini taahhüd ettikleri Vilâyet-i Anadolu’da Kangırı Sancağı’nda Keskin kazâsında vâki‘ Yüzdepâre Kangırı mukāta‘asına ber-vech-i mâlikâne mutasarrıf olan el-Hâc Ahmed Ağa b. el-Hâc Şa‘ban ve şerîki Ömer Ağa b. İsmail b. Abdurrahman tarafından husûs-ı âti’z-zikre vekîl olduğu Mustafa Ağa b. Ali ve el-Hâc Mehmed b. İbrahim şehâdetleriyle şer‘an sâbit olan Mehmed Efendi b. Mustafa Efendi meclis-i şer‘-i şerîf-i enverde mukāta‘a-i mezbûre kurâsından Karakeçili nâm karye ahâlîsinden Mustafa b. Zülfikar ve Mehmed b. Himmet ve Mahmudlar karyesi ahâlîsinden Karlı b. Nuri Akīne ve Abdülcenan b. Osman ve Hasan b. Ömer ve Karalar karyesi ahâlîsinden Hüseyin b. Ali ve Sanciran karyesi ahâlîsinden Hasan b. el-Hâc Ahmed ve Gökdere karyesi ahâlîsinden Mehmed b. Nasuh mahzarlarında her biri bi’l-asâle ve bi’l-vekâle takrîr-i kelâm ve bast-ı merâm edip mezbûrûn karye ahâlîleri mukāta‘a-i mezkûre re‘âyâlarından olup yedimizde olan berat-ı âlîşân ve sûret-i defter-i hâkānîde mücerred olanlarından senede yüz yirmi akçe ve müteehhil olanlarından ber-vech-i muharrer senede üç yüz akçe resm-i bennâk alınmak mastûr ve mukayyed iken mezkûrûn re‘âyânın hâllerine merhameten mücerred olanlarından senede yüz akçe ve müteehhil olanlarından senede iki yüz altmış akçe resm alıp bundan ziyâde ahz u kabz etmemek üzere ta‘ahhüd ve ittifâk eylediğimizde mezbûr Mustafa bizden müdde‘âsı olan altmış beş guruşa ve mezbûr Mehmed altı guruşa ve mezbûr Abdülcenan elli guruşa [42a] ve mezbûr Karlı altmış guruşa mezbûr Hasan on beş guruşa ve mezbûr Hüseyin beş guruşa ve mezbûr Hasan on üç guruşa ve merkūm Mehmed kırk guruşa müte‘allika âmme-i da‘vâdan bizim zimmetimizi ibrâ-i âm ile ibrâ ve ıskāt eylediler. Min-ba‘d bir birimiz ile kat‘a da‘vâ ve husûmetimiz yokdur dediklerinde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fî-gurreti Zilhicce sene [1]143. Şuhûdü’l-hâl: Mustafa Ağa b. Ali, el-Hâc Mehmed b. İbrahim, Mehmed Çelebi b. Abdullah, Abdullah Çelebi b. Mustafa, İbrahim b. Mustafa.