Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 193 Hüküm no: 182 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miftâhî Mustafa Ağa’nın kereste borcuyla takas olmak üzere Çobançavuş mahallesinde bulunan evini sattığı Mübâya‘a ve takās. Bâ-imzâ-i hazret-i efendi. Husûs-ı âti’l-beyânın mahâllinde ketb ve tahrîri için bi’l-iltimâs savb-ı şer‘-i şerîf-i enverden irsâl olunan Mevlânâ Hüseyin Efendi b. Mehmed Dârü’l-hilâfeti’l-aliyye Kostantıniyyeti’l-mahmiye’de vâki‘ Çobançavuş mahallesinde sâkin Sadrazam-ı sâbık merhûm İbrahim Paşa kethudâsı müteveffâ Mehmed Paşa’nın hayatında etbâ‘ından Miftâhî Mustafa Ağa b. Abdullah’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde mezbûr Mustafa Ağa meclis-i ma‘kūd-ı mezkûrda Keresteci tâifesinden işbu hâfızü’s-sifr Gülâbî v. Norsis nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Hüseyin Çavuş tasarrufunda olan vakıf menzil ve ba‘zen Kazasker Ömer Efendi vakfından mezbûr Mustafa Ağa tasarrufunda olan menzil ve üç tarafdan tarîk-ı âm ile mahdûd fevkānî iki bâb oda ve bir sofa ve tahtânî iki bâb sagīr oda ve bir sofa ve kenîf ve bir mikdâr havluyu müştemil mülk menzilimi cümle tevâbi‘ ve levâhıkı ile tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile merkūm Gülâbî zimmîye altı yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz eylediğinden sonra semeni olan meblağ-ı mezbûr altı yüz elli guruşu müşteri-yi merkūm Gülâbî yedinden mukaddemâ iştirâ ve kabz [ve] tesellüm eylediğim kereste semeninden zimmetimde mezbûra vâcibü’l-edâ ve lâzımü’l-kazâ deynim olan üç bin guruşun altı yüz elli guruşuna takās ve mahsûb edip ol dahi minvâl-i muharrer üzere mukāssa ve kabûl eyledi. Fîmâ-ba‘d menzil-i mahdûd-ı mezkûr merkūm Gülâbî zimmînin mülk-i müşterâsı ve hakk-ı sırfı olup kat‘a benim alâka ve medhalim kalmamışdır. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan Çukadâr Süleyman b. İbrahim ve muhzır el-Hâc Mehmed b. İbrahim ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 5 min-Zilhicceti’ş-şerîfe sene [1]143. Şuhûdü’l-hâl: es-Seyyid Osman Efendi b. İbrahim, Müezzin Seyyid Süleyman Halîfe b. İbrahim, Süleyman Çelebi b. Hasan sahhâf, Attar Mustafa Çelebi, Hâfız Hüseyin Efendi b. Receb, Kâtib Ahmed Efendi b. Mehmed, Mehmed Ağa b. Abdullah, Abdurrahman Çelebi b. Abdullah, Ahmed Efendi b. Hasan, Karakaş Mehmed Çelebi.