Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 192 Hüküm no: 181 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nallımescid mahallesinden Nimetullah Hatun’un kocası Ali Efendi’nin Tebriz’de öldüğü İhbâr. Mahmiye-i İstanbul’da Nallımescid mahallesi sâkinelerinden bâ‘isetü’l-vesîka Nimetullah bt. Ali nâm hatundan ber-vech-i âtî istihbâr-ı şer‘î sudûrundan sonra udûl-i ahrâr-ı Müslimînden Firuzağa mahallesi sükkânından Ahmed Efendi b. Mehmed ve Ali Çelebi b. Süleyman nâm kimesneler li-ecli’l-ihbâr meclis-i şer‘a hâzırân olup istihbâr olunduklarına fi’l-hakīka işbu müstahbire-i mezbûre Nimetullah Hatun’un zevc-i olup < devletlü Tebriz vâlîsi olan Kara Mustafa Paşa’nın Dîvân Efendisi Ali Efendi b. Mehmed nâm kimesne bin yüz kırk iki senesinde vâki‘ Cumâdelâhiresi gurresinde medîne-i Tebriz’de bi-emrillâhi te‘âlâ ishâl marazından hastalanıp maraz-ı merkūmdan vefât ettiğini re’yü’l-ayn müşâhade ve defn eyledik deyü her biri alâ-tarîkı’ş-şehâde haber vermeleriyle hıfzan li’l-makāl mâ-vaka‘a bi’t-taleb ketb olundu. Fî 8 Zilhicce sene [1]143. Şuhûdü’l-hâl: Mehmed Çelebi b. Abdullah bölükbaşı, Salih Çelebi b. Süleyman muhzır, Yakub b. Abdullah muhzır, İbrahim b. Mustafa du‘âcı.