Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 195 Hüküm no: 184 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miftâhî Mustafa Ağa’nın kereste borcuyla takas olmak üzere Çobançavuş mahallesinde bulunan evini sattığı Mübâya‘a. Bâ-imzâ-i hazret-i efendi. Husûs-ı âti’l-beyânın mahâllinde ketb ve tahrîri iltimâs olunmağın savb-ı şer‘-i şerîf-i enverden irsâl olunan Mevlânâ Hüseyin Efendi b. Mehmed Dârü’l-hilâfeti’l-aliyye Kostantıniyyeti’l-mahmiye’de vâki‘ Çoban çavuş mahallesinde sâkin Sadrazam-ı sâbık merhûm İbrahim Paşa kethudâsı müteveffâ Mehmed Paşa’nın hayatında etbâ‘ından Miftâhî Mustafa Ağa b. Abdullah’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde mezbûr Mustafa meclis-i ma‘kūd-ı mezkûrda Keresteci tâifesinden işbu hâfızü’s-sifr Gülâbî v. Norsis nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Hüseyin Çavuş bin ( ) tasarrufunda olan menzil ve üç tarafdan tarîk-ı âm ile mahdûd fevkānî bir bâb oda ve bir sofa ve tahtânî bir bâb oda ve kilâr ve bir sofa ve matbah ve bir kenîf ve bir mikdâr havluyu müştemil mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-ı kat‘î ile merkūm Gülâbî zimmîye altı yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz eylediğinden sonra semeni olan meblağ-ı mezbûr altı yüz elli guruşu müşteri-yi merkūma ma‘lûmü’l-mikdâr kereste semeninden zimmetimde edâsı lâzım ve deynim olan üç bin guruşun ol mikdârına takās ve mahsûb eylediğimde ol dahi minvâl-i meşrûh üzere mukāssa ve kabûl eyledi. Fîmâ-ba‘d menzil-i mahdûd-ı mezkûr merkūm Gülâbî zimmînin mülk-i müşterâsı ve hakk-ı sırfı olup kat‘a benim alâka ve medhalim kalmamışdır. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan Çukadâr Süleyman b. İbrahim ve muhzır el-Hâc Mehmed b. İbrahim ile meclis-i şer‘a gelip inhâ ve takrîr etmeğin mâ-vaka‘a bi’t-taleb ketb olundu. Fî 5 min-Zilhicce sene [1]143. Şuhûdü’l-hâl: eş-Şâhidûnü’s-sâbıkūn.