Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 195 Hüküm no: 185 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miftâhî Mustafa Ağa’nın kereste borcuyla takas olmak üzere Çobançavuş mahallesinde bulunan evini sattığı Mübâya‘a. Bâ-imzâ-i hazret-i efendi. Husûs-ı âti’l-beyânın mahâllinde ketb ve tahrîri için bi’t-taleb kıbel-i şer‘den irsâl olunan Mevlânâ Hüseyin Efendi b. Mehmed Mahmiye-i İstanbul’da Çoban çavuş mahallesinde sâkin Sadrazam-ı sâbık merhûm İbrahim Paşa kethudâsı müteveffâ Mehmed Paşa etbâ‘ından Miftâhî Mustafa Ağa b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ettikde mezbûr Mustafa Ağa meclis-i ma‘kūd-ı mezkûrda işbu hâfızü’s-sifr Keresteci tâifesinden işbu hâfızü’s-sifr Gülâbî v. Norsis nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde [46a] mülk ve hakkım olup mahalle-i mezbûrede vâki‘ bir tarafdan İğneci el-Hâc İbrahim menzili ve bir tarafdan Tüfekçi Hasan Çelebi menzili ve bir tarafdan Bakkal Mehmed Çelebi menzili ve bir tarafdan tarîk-ı âm ile mahdûd fevkānî ve tahtânî dört bâb oda ve bi’r-i mâ ve kenîf ve bir mikdâr havluyu müştemil mülk menzili bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile merkūm Gülâbî zimmîye beş yüz guruşa bey‘ ve temlîk ve teslîm ol dahi ber-vech-i muharrer iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr beş yüz guruşu zimmetimde kereste bahâsından merkūm Gülabî’ye deynim olan üç bin guruşun beş yüz guruşuna takās ve mahsûb eylediğimde ol dahi mukāssa ve kabûl edip ba‘de’l-yevm menzil-i mahdûd-ı mezkûr merkūm Gülâbî zimmînin mülk-i müşterâsı olup benim kat‘a alâka ve medhalim kalmadı. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ve ma‘an ba‘s olunan Çukadâr Süleyman b. İbrahim ve muhzır el-Hâc Mehmed b. İbrahim ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 5 min-Zilhicceti’ş-şerîfe sene [1]143. Şuhûdü’l-hâl: Umdetü’l-küttâb Ahmed Efendi b. Mehmed, es-Seyyid Osman Efendi b. İbrahim el-imâm bi-mahalleti’l-mezbûr, Seyyid Süleyman Halîfe b. İbrahim el-müezzin, Sahhâf Süleyman Çelebi b. Hasan, Hâfız Hüseyin Efendi b. Receb, Mustafa Ağa b. Mehmed, Mehmed Ağa b. Abdullah, el-Hâc Mehmed b. İbrahim, Berber Abdurrahman Çelebi b. Abdullah, Ahmed Efendi b. Hasan, Karakaş Mehmed Çelebi b. Abdullah.