Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 204 Hüküm no: 195 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın ekmekçi Parnak’a olan borcunun ödenmesi Sadrazam-ı sâbık merhûm İbrahim Paşa kethudâsı Mehmed Paşa b. el-Hâc Mustafa b. Abdurrahman’ın dâyinlerinden râfi‘u’s-sifr Habbâz Parnak v. Haçik meclis-i şer‘-i hatîr-i lâzımü’t-tevkīrde müteveffâ-yı merkūmun emvâl ve eşyâsı tarafı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı olan izzetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’a iki buçuk ayda verdiğim nân-ı azîz semeninden zimmetlerinde dört yüz elli dokuz guruş hakkım müctemi‘ olup hatta meblağ-ı mezkûr <> zimmetlerinde bana vâcibü’l-edâ deynleri olduğunu ikrâr ve işhâd edip kable’l-edâ fevt olmağla tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūmun hayatında etbâ‘ından vekîlharc el-Hâc Mustafa Ağa b. Abdullah ve Miftâhî Mustafa Ağa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında Parnak zimmînin iki buçuk ayda matbahımıza ve etbâ‘ımıza verdiği nân-ı azîz semeninden merkūm Parnak zimmîye zimmetimde dört yüz elli dokuz guruş vâcibü’l-edâ deynimdir deyü bizim huzûrumuzda ikrâr ve bizi işhâd etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde ta‘dîl ve’t-tezkiye şehâdetleri makbûle olmağın gıbbe’l-mu‘teberi’ş-şer‘î mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘de sene 1143. Şuhûdü’l-hâl: eş-Şâhidûnü’s-sâbıkūn.