Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 204 Hüküm no: 194 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın bahçesine malzeme getiren Mehmed’e olan borcunun ödenmesi Ve kezâlik râfi‘u’l-kitâb Mehmed Bey b. Mustafa meclis-i şer‘-i şerîf-i enverde müteveffâ-yı merkūmun emvâl ve eşyâsı tarafı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı izzetlü ve sa‘âdetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı [merkūm] Mehmed Paşa <<İbrahim>> b. el-Hâc Mustafa b. Abdurrahman’ın emriyle bahçelerine getirdiğim toprak ve çakıltaşı ve hammâliyelerine bi-şarti’r-rücû‘ mâlımdan yüz otuz dört guruş masrafım olup hatta müteveffâ-yı merkūm hayatında meblağ-ı mezbûr zimmetlerinde bana vâcibü’l-edâ ve lâzımü’l-kazâ deynleri olduğunu ikrâr ve işhâd dahi edip kable’l-edâ fevt olmağla tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūm Mehmed Paşa b. el-Hâc Mustafa’nın hayatında etbâ‘ından Harem Kethudâsı Mustafa Ağa b. Halil ve çukadâr Mustafa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında müdde‘î-yi merkūm Mehter Mehmed’in bahçeme getirdiği toprak ve çakıl ve hammâliyelerine bi-şarti’r-rücû‘ mâlından sarf eylediği yüz otuz dört guruşu mezbûr Mehter Mehmed’e zimmetimde vâcibü’l-edâ ve lâzımü’l-kazâ deynimdir deyü bizim huzûrumuzda ikrâr ve bizi işhâd eylemişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde bâde’t-ta‘dîl ve’t-tezkiye şehâdetleri makbûle olmağın [48b] gıbbe’t-tahlîfi’l-mu‘teber mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘de sene 1143. Şuhûdü’l-hâl: eş-Şâhidûnü’s-sâbıkūn.