Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 208 Hüküm no: 200 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın Bakkal Panayot’a olan borcunun ödenmesi Sadrazam-ı sâbık merhûm İbrahim Paşa kethudâsı müteveffâ Mehmed Paşa b. el-Hâc Mustafa b. Abdurrahman’ın dâyinlerinden râfi‘u’s-sifr Bakkal Panayot v. Dimitri meclis-i şer‘-i şerîf-i enverde müteveffâ-yı merkūmun emvâl ve eşyâsı taraf-ı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı izzetlü sa‘âdetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi [50a] mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’ın emriyle bey‘ ve kabza me’mûr olana ber-[mû]ceb-i defter teslîm eylediğim ecnâs-ı zahîre semenlerinden zimmetlerinde altı yüz on bir buçuk guruş hakkım müctemi‘ olup hatta müteveffâ-yı merkūm hayatında meblağ-ı mezbûr zimmetlerinde bana edâsı lâzım deyni olduğunu alâ-ruûsi’l-işhâd ikrâr ve işhâd edip kable’l-edâ fevt olmağla tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūmun hayatında etbâ‘ından Seyfullah Ağa b. Abdullah ve Miftâhî Mustafa Ağa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında Bakkal Panayot zimmîden iştirâ olunup kabza me’mûra ber-mûceb-i defter-i müfredât teslîm eylediği ecnâs-ı zahîre semenlerinden merkūm Bakkal Panayot’a zimmetimde altı yüz on bir buçuk guruş vâcibü’l-edâ ve lâzımü’l-kazâ deynimdir deyü bizim huzûrumuzda ikrâr ve bizi işhâd eylemişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde bâde’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘de li-sene 1143. Şuhûdü’l-hâl: eş-Şâhidûnü’s-sâbıkūn.